ۆاشينگتون ماسكەۋگە سانكسيالار سالۋدى جالعاستىرىپ جاتقان كەزدە رەسەي ۇلتتىق قورىنان اقش دوللارىن قىسقارتاتىنىن حابارلادى.

بۇل قادام تۋرالى سانكت-پەتەربۋرگتەگى حالىقارالىق ەكونوميكالىق فورۋمدا رەسەي قارجى ءمينيسترى انتون سيلۋانوۆ مالىمدەدى.

– ورتالىق بانك سياقتى ءبىز دە ۇلتتىق قوردان دوللار اكتيۆتەرىمەن ينۆەستيسيالاردى قىسقارتۋعا شەشىم قابىلدادىق، – دەدى ول. 

ونىڭ ورنىنا ەۋرو، جۇڭگو ءيۋانى جانە التىن اكتيۆتەرىمەن ينۆەستيسيا سالىنادى.

وزگەرىستەر كەلەسى ايدىڭ ىشىندە بولادى دەپ حابارلاندى.

قورداعى ەۋرو اكتيۆتەرىنىڭ ۇلەسى 40%-دى، يۋان 30% جانە التىن 20%-دى قۇرايدى دەپ كۇتىلۋدە. سونىمەن قاتار، جاپون يەناسى مەن بريتانيالىق فۋنت 5% قۇراۋى مۇمكىن.

2020 جىلعى اقش پرەزيدەنت سايلاۋىنا ارالاسۋ، اقش ۇكىمەتى مەن كورپوراتيۆتى جەلىلەرىنە جاسالعان ۇلكەن كيبەرشابۋىل، قىرىمدى اننەكسيالاۋ جانە باسىپ الۋ جانە ادام قۇقىعىن بۇزۋ فاكتىلەرى بويىنشا بايدەن اكىمشىلىگى ماسكەۋگە قارسى جاڭا سانكسيالار ەنگىزگەن. دەگەنمەن، رەسەي ۇكىمەتى بارلىق ايىپتاۋلاردى جوققا شىعارادى.