ءبىلىم جانە عىلىم ءمينيسترىنىڭ بۇيرىعىمەن ءبىلىم بەرۋ ۇيىمدارىنا كىرگىزۋگە تىيىم سالىنعان جانە پايدالانۋعا بولمايتىن زاتتاردىڭ ءتىزىمى بەكىتىلدى.
بۇل تىزىمگە قارۋدىڭ بارلىق ءتۇرى، وق-دارىلەر، جارىلعىش زاتتار، سونداي-اق تەسۋگە جانە كەسۋگە ارنالعان زاتتار كىرەدى.
– ءبىلىم بەرۋ ۇيىمدارىندا تىيىم سالىنعان زاتتاردىڭ ءتىزىمىن ازىرلەۋگە ءبىز وتكەن جىلى كىرىستىك. وسى جىلدىڭ قاڭتار ايىنان باستاپ "ءبىلىم تۋرالى" زاڭ شەڭبەرىندە وسى ءتىزىمدى ازىرلەۋ جانە بەكىتۋ ءبىزدىڭ قۇزىرەتىمىزدە. تىيىم سالىنعان زاتتاردىڭ ءتىزىمى ىشكى ىستەر مينيسترلىگى، دەنساۋلىق ساقتاۋ مينيسترلىگى، سيفرلىق دامۋ، يننوۆاسيالار جانە اەروعارىش ونەركاسىبى مينيسترلىكتەرىمەن، ۇقك، باس پروكۋراتۋرامەن جانە جوعارعى سوتپەن بىرلەسىپ جاسالدى، – دەپ اتاپ ءوتتى ءبىلىم جانە عىلىم ءمينيسترى اسحات ايماعامبەتوۆ.
مينيسترلىكتىڭ حابارلاۋىنشا، جاڭا نورمانى ەنگىزۋ وقۋشىلار ءۇشىن ءقاۋىپسىز جانە جايلى ورتا قالىپتاستىرۋعا، سونداي-اق قۇقىق بۇزۋشىلىقتاردى ۋاقىتىلى انىقتاۋعا جانە ونىڭ الدىن الۋعا مۇمكىندىك بەرەدى.
وسىلايشا، مەكتەپتەرگە قارۋ مەن وعان سىرتقى ۇقساستىعى بار زاتتاردى اكەلۋگە قاتاڭ تىيىم سالىنادى. بۇدان بولەك، ءبىلىم بەرۋ ۇيىمدارىندا شانشيتىن، كەسەتىن جانە وتكىر زاتتاردى، ونەركاسىپتىك قۇرالداردى، وق-دارىلەردى، جارىلعىش، ۋلى، پسيحواكتيۆتى زاتتاردى اكەلۋگە جانە پايدالانۋعا جول بەرىلمەيدى.
سونداي-اق مەكتەپ وقۋشىلارىنىڭ وقۋ ساباقتارى كەزىندە سمارتفون، پلانشەت، پلەيەرلەردى پايدالانۋىنا شەكتەۋ ەنگىزىلەدى. بۇل شەكتەۋلەر دەنساۋلىقتى باقىلاۋ ءۇشىن سمارتفوندى قاجەت ەتەتىن ەرەكشە ءبىلىم بەرۋ قاجەتتىلىكتەرى بار بالالارعا قاتىستى ەمەس. ماسەلەن، قانت ديابەتى بار وقۋشىلارعا قانداعى قانتتى باقىلاۋ ءۇشىن سمارتفون قاجەت بولۋى مۇمكىن.
ەگەر دە بالالار تىيىم سالىنعان زاتتاردى ءبىلىم بەرۋ ۇيىمدارىنا كىرگىزسە بۇعان ولاردىڭ اتا-انالارى مەن زاڭدى وكىلدەرى جاۋاپ بەرەدى.
پىكىر قالدىرۋ