ايداربايەۆ پرەزيدەنتكە ۇلتتىق كومپانيانىڭ بىلتىرعى اتقارعان جۇمىستارىنىڭ ناتيجەلەرى تۋرالى ەسەپ بەرىپ، ورتا مەرزىمدەگى دامۋ ستراتەگياسى تانىستىردى.
سونىمەن قاتار ول توقايەۆقا "قازمۇنايگاز" كومپانياسىنىڭ داعدارىس جاعدايىندا قارجىلىق تۇراقتىلىقتى ساقتاعانىن جانە قازىرگى ۋاقىتتا پاندەمياعا دەيىنگى كورسەتكىشتەرگە قول جەتكىزۋ باعىتىندا جۇمىس جۇرگىزىلىپ جاتقانىن مالىمدەدى.
"مەملەكەت باسشىسىنا كاسپيي قايراڭىنداعى پايدالى قازبالاردى يگەرۋ جونىندەگى "اباي"، "يساتاي"، "جەڭىس" جانە "ءال-فارابي" سياقتى ينۆەستيسيالىق جوبالاردىڭ قازىرگى مارتەبەسى تۋرالى اقپارات بەرىلدى. اليك ايداربايەۆ پوليپروپيلەن، پوليەتيلەن جانە بۋتاديەن ءوندىرىسى بويىنشا مۇناي-گاز حيمياسى جوبالارىنا قاتىستى جۇمىستاردىڭ بارىسىنا ارنايى توقتالدى. سونىمەن قاتار جاڭارتىلاتىن قۋات كوزدەرىن دامىتۋ جانە كومىرتەگىنەن تازارتۋ جونىندەگى كومپانيانىڭ جوسپارلارى تۋرالى ايتتى.
"قازمۇنايگاز" ۇك" اق باسقارما ءتوراعاسى پرەزيدەنتكە ۇلتتىق كومپانيانىڭ ىسكە اسىرىپ جاتقان الەۋمەتتىك ماڭىزى بار جوبالارى جايىندا، اتاپ ايتقاندا، "استراحان-ماڭعىشلاق" ماگيسترالدى سۋ قۇبىرىنىڭ قايتا جوندەلۋى جانە ماڭعىستاۋ وبلىسىنىڭ كەندىرلى كەنتىندەگى سۋ تۇشىتاتىن زاۋىتتىڭ قۇرىلىسى تۋرالى باياندالدى" دەلىنگەن رەسمي سايت حابارلاماسىندا.
كەزدەسۋ قورىتىندىسى بويىنشا قاسىم-جومارت توقايەۆ اليك ايداربايەۆقا ۇلتتىق كومپانيانىڭ قارجىلىق تۇراقتىلىعىن ودان ءارى ساقتاۋعا، ينۆەستيسيالىق جانە ينفراقۇرىلىمدىق جوبالاردى ىسكە اسىرۋعا، جاڭارتىلاتىن قۋات كوزدەرىن پايدالانۋعا قاتىستى ءبىرقاتار تاپسىرما بەردى. سونداي-اق جۇمىسپەن قامتۋ ماسەلەسىن جانە كومپانيا قىزمەتكەرلەرىنىڭ الەۋمەتتىك جاعدايىن باقىلاۋدا ۇستاۋدى تاپسىردى.
پىكىر قالدىرۋ