قوعام بەلسەندىسى مۇحتار تايجان قازاقستاندا قىمباتشىلىق ورشۋىنە بايلانىستى ۇكىمەتتىڭ ەكونوميكا سالاسىنا جاۋاپتى تۇلعالارىن قىزمەتتەن الۋ تۋرالى باستاما كوتەردى.
– قىمباتشىلىق حالىقتى ابدەن باسىپ كەتتى. ادامدار ۋجە تاماقتى ساتىپ الۋ ءۇشىن كرەديت الىپ وتىر. اۋىلداعى دۇكەندەر حالىققا ازىق-تۇلىكتى قارىزعا بەرىپ جاتىر. ال حالىق كەدەيشىلىككە جانە كرەديتكە باتىپ قالدى.
ەشقانداي ەكونوميكالىق رەفورما ءجۇرىپ جاتقان جوق. ەكونوميكا ءمينيسترىن ەشكىم كورگەن دە جوق، ەستىگەن دە جوق. ەكونوميكا ءمينيسترى بىزدە بار ما ءوزى؟ رەفورما كەڭەسى دە جۇمىس اتقارىپ جاتقان جوق.
ۋاقىت ءوتىپ بارادى، ال ەكونوميكالىق رەفورما باستالعان دا جوق. باياعى جارتاس سول جارتاس. ەكونوميكامەن 20 جىل بويى اينالىساتىن ەسكى كادرلارىن قۋىپ شىعىپ جاڭا كادرلارىن جۇمىسقا تارتۋ كەرەك. ءوز باسىم ايتام، مەنى شاقىرسا، مەن ناعىز ەكونوميكالىق رەفورمانى جۇزەگە اسىرۋ ءۇشىن بارار ەم. ءبىراق قايدام، مەن بارسام ناعىز رەفورما باستالادى عوي، ال وعان وليگارحات قارسى...، – دەپ جازدى مۇحتار تايجان facebook پاراقشاسىندا.
