«Nur Otan» پارتياسى العاش رەت ەل كولەمىندە دەپۋتاتتىق كورپۋستى كەشەندى باعالاۋدىڭ ءبىرىڭعاي جۇيەسىن ەنگىزدى. بۇل تۋرالى «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك Facebook-تەگى پاراقشاسىندا جازدى.

«قۇرمەتتى دوستار!
وزدەرىڭىزگە ءمالىم، «Nur Otan» «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلامالارىن ورىنداۋ بويىنشا 217 جول كارتاسىن ىسكە اسىرۋعا جۇيەلى باقىلاۋدى جولعا قويعان. وسىلايشا، 5 اي ىشىندە 362 رەسپۋبليكالىق ءىس-شارانىڭ 7%ء-ى ورىندالدى، ال وڭىرلىك 2،3 مىڭ ءىس-شارانىڭ 5%ء-ى اتقارىلدى.

ەلباسى، پارتيا ليدەرى ن.ءا. نازاربايەۆ ايتقانداي، «Nur Otan» دەپۋتاتتارى جاۋاپكەرشىلىك، جۇدىرىقتاي جۇمىلۋ جانە ورتاق مۇرات-ماقساتتارعا ادالدىق قاعيداتتارىن باسشىلىققا الا وتىرىپ، ءاربىر وڭىردە، قالا مەن اۋداندا سايلاۋالدى مىندەتتەمەلەردىڭ ساپالى ورىندالۋىن قامتاماسىز ەتۋى ءتيىس.

بۇل جۇمىسقا «Nur Otan»-نىڭ ءار ءتۇرلى دەڭگەيدەگى 2،7 مىڭنان استام دەپۋتاتى جەكە جاۋاپ بەرەدى. ەسكە سالا كەتەيىن، ەلباسى باستاماشىلىق ەتكەن «سەنىم. ديالوگ. بولاشاققا نىق قادام!» اتتى پارتيالىق «قايتا جانداندىرۋ» باعدارلاماسىنا سايكەس دەپۋتاتتىق كورپۋس 65%-كە جاڭارتىلدى، ايەلدەر مەن جاستاردىڭ ۇلەس سانى بارلىق وڭىردە تيىسىنشە 30% جانە 20%-كە جەتتى» دەپ جازدى ول.

باۋىرجان بايبەك ەل پرەزيدەنتى ق.ك. توقايەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىنا سايكەس پارتيا جانىنان دەپۋتاتتاردىڭ، ۇكىمەتتىك ەمەس ۇيىم وكىلدەرىنىڭ، بەلگىلى قوعام قايراتكەرلەرىنىڭ، ساراپشىلار مەن جۋرناليستەردىڭ قاتىسۋىمەن 1،7 مىڭ سالالىق قوعامدىق كەڭەس قۇرىلعانىن اتاپ ءوتتى.

«بۇل بيلىك پەن ازاماتتىق قوعام اراسىنداعى جان-جاقتى ديالوگتى قامتاماسىز ەتۋگە جول اشادى.

سونىمەن قاتار قوعامدىق باقىلاۋدىڭ تيىمدىلىگىن ارتتىرۋ جانە حالىقپەن «كەرى بايلانىستى» كۇشەيتۋ ءۇشىن بۇكىل ەل كولەمىندە پارتيانىڭ 234 قوعامدىق قابىلداۋ بولمەسىنىڭ قىزمەتى جۇيەلى تۇردە جانداندىرىلدى. جىل باسىنان بەرى «Nur Otan»-عا 74،1 مىڭ ءوتىنىش كەلىپ ءتۇستى، ونىڭ 43%ء-ى وڭ شەشىمىن تاپتى، 53%ء-ى بويىنشا ماسەلەنى زاڭ اياسىندا شەشۋگە قاتىستى كاسىبي كەڭەس بەرىلدى.

ەلباسى اتاپ وتكەندەي، بۇگىندە قوعام، اسىرەسە جەرگىلىكتى جەرلەردە دەپۋتاتتاردىڭ اشىقتىق، تيىمدىلىك جانە جاۋاپكەرشىلىك دەڭگەيىنە ەرەكشە تالاپتار قويىپ وتىر.

وسىنى ەسكەرە وتىرىپ، «Nur Otan» العاش رەت ەل كولەمىندە دەپۋتاتتىق كورپۋستى كەشەندى باعالاۋدىڭ ءبىرىڭعاي جۇيەسىن ەنگىزىپ وتىر. پارتيانىڭ ساياسي كەڭەسى بيۋروسىنىڭ بيىلعى 2 ماۋسىمداعى قاۋلىسىمەن دەپۋتاتتار قىزمەتىنىڭ رەيتينگىن قالىپتاستىرۋ ەرەجەسى بەكىتىلدى.

اتالعان ەرەجەنى ازىرلەۋ اياسىندا حالىقارالىق تاجىريبە مەن دەپۋتاتتاردى باعالاۋدىڭ قولدانىستاعى تاجىريبەسىن زەردەلەۋ بويىنشا اۋقىمدى جۇمىستار اتقارىلدى. ساراپشىلار مەن وڭىرلەردەگى پارتيالىقتاردىڭ پىكىرلەرى، سونداي-اق رەسپۋبليكالىق پارتياىشىلىك ىرىكتەۋ – پرايمەريزدىڭ تابىستى تاجىريبەلەرى ەسكەرىلدى.

ەرەجە ءۇش بلوكقا بىرىكتىرىلگەن 15 كريتەرييدى قامتيدى: قوعامدىق-ساياسي قىزمەت، مەديا بەلسەندىلىك، سونداي-اق پارتيالىق جاۋاپكەرشىلىك.
زاماناۋي رەيتينگتىك تەحنولوگيالاردى ەنگىزۋ دەپۋتاتتاردىڭ جول كارتالارىن ىسكە اسىرۋعا جەكە جاۋاپكەرشىلىگىن ارتتىرىپ، نۇروتاندىقتاردى حالىقپەن جۇيەلى جانە ناتيجەلى جۇمىس ىستەۋگە باعىتتايتىنىنا سەنىمدىمىن.

سونىمەن قاتار 1 قىركۇيەكتەن باستاپ ازاماتتار ءۇشىن جەرگىلىكتى جەرلەردەگى دەپۋتاتتاردىڭ قىزمەتى، باستامالارى مەن ساۋالدارى تۋرالى اقپاراتقا اشىق قولجەتىمدى، سونداي-اق، «Nur Otan»-نان سايلانعان حالىق قالاۋلىلارىنا وزەكتى ماسەلەلەر بويىنشا تىكەلەي جۇگىنۋ مۇمكىندىگى قامتىلعان ارنايى ينتەرنەت-پلاتفورما ىسكە قوسىلادى.

جەرگىلىكتى ءوزىن-وزى باسقارۋ ورگاندارىنىڭ وكىلەتتىكتەرىن كەڭەيتۋ جانە اكىمدەردىڭ تىكەلەي سايلانبالىلىعىن ەنگىزۋ جاعدايىندا قابىلدانىپ جاتقان شارالار ەلباسىنىڭ 5 ينستيتۋسيونالدىق رەفورماسى شەڭبەرىندە اشىق جانە ەسەپ بەرەتىن مەملەكەتتى قالىپتاستىرۋ بويىنشا تاعى ءبىر جۇيەلى قادام بولادى دەپ ەسەپتەيمىز» دەلىنگەن باۋىرجان بايبەكتىڭ جازباسىندا.