پارلامەنت ءماجىلىسىنىڭ دەپۋتاتتارى جالپى وتىرىستا "قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتاردىڭ جەكەلەگەن ساناتتارىن الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن ەكىنشى وقىلىمدا ماقۇلداپ، سەناتتىڭ قاراۋىنا جىبەردى.

اتالعان زاڭ جوباسى مۇگەدەكتىگى بار ادامداردىڭ قۇقىقتارىن قامتاماسىز ەتۋدى جانە تۇرمىس ساپاسىن جاقسارتۋدى، مۇگەدەكتىگى بار ادامداردى، مۇگەدەكتىگى بار بالالاردى تاربيەلەپ وتىرعان وتباسىلاردى، ەڭبەك ارداگەرلەرىن الەۋمەتتىك قورعاۋدى كوزدەيدى. 

ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ بۇگىندە I توپتاعى مۇگەدەكتىگى بار 66 مىڭ ادامنىڭ ءاربىر ءۇشىنشىسى كۇتىم جاردەماقىسىمەن دە، جەكە كومەكشىنىڭ قىزمەتتەرىمەن دە قامتاماسىز ەتىلمەگەنىن ايتتى. ونىڭ سوزىنشە، زاڭ جوباسىن قابىلداۋ ناتيجەسىندە سىرتقى قامقورلىققا مۇقتاج 24 مىڭ ادام كۇتىم بويىنشا جاردەماقىمەن قوسىمشا قامتىلادى.  

"اتالعان زاڭ جوباسىنىڭ ارقاسىندا 7 جاستان 16 جاسقا دەيىنگى مۇگەدەك بالالارعا مۇگەدەكتىك توبى بەرىلەدى. مۇگەدەك بالالاردىڭ بارلىق توبى ءۇشىن جاردەماقى مولشەرى 16،7%-تەن 37%-كە دەيىن كوتەرىلەدى. بۇل شارا 30 مىڭنان استام مۇگەدەك بالانى قامتيدى.

بۇگىندە مۇگەدەكتىگى بار بالالاردىڭ اتا-انالارى اجىراسقان ۋاقىتتا اليمەنتپەن مۇگەدەكتىگى بويىنشا جاردەماقى الا الادى. ال اتا-اناسىنىڭ بىرەۋى نەمەسە ەكەۋى قايتىس بولعان جاعدايدا، بالا مۇگەدەكتىگى بويىنشا نەمەسە اسىراۋشىسىنان ايىرىلۋ بويىنشا جاردەماقىعا يە بولادى.

وتىرىستا تالقىلانعان زاڭ جوباسى ەڭبەك جاراقاتىنان مۇگەدەك بولىپ قالعان ادامداردىڭ مەملەكەت ەسەبىنەن وڭالتۋعا، مۇگەدەكتىگى بار بالالاردى تاربيەلەپ وتىرعان وتباسىلاردىڭ بالالارى كامەلەتكە تولعاننان كەيىن تۇرعىن ءۇي كەزەگىندە تۇرۋ قۇقىعىن ساقتاۋعا مۇمكىندىك بەرەدى. 

قازىرگى كەزدە مۇنداي وتباسىلار تۇرعىن ءۇي كەزەگىندە 10 جىلعا دەيىن تۇرادى. بالا 18 جاسقا تولعانعا دەيىن تۇرعىن ءۇي بەرىلمەسە، مۇگەدەكتىگى بار ازامات كەزەككە قايتا تۇرۋعا ءماجبۇر. ال جاڭا نورمانىڭ ارقاسىندا 20 مىڭنان استام وتباسى تۇرعىن ءۇي كەزەگىن ساقتاي الادى" دەلىنمەن مينيسترلىك تاراتقان اقپاراتتىق حابارلامادا.