ءبىلىم جانە عىلىم ءمينيسترى اسحات ايماعامبەتوۆتىڭ facebook پاراقشاسىندا ۇستازدارعا جازعان حاتى جاريالاندى.
– قىمباتتى ارىپتەسىم! مىنە، بارشامىز ءۇشىن قيىن ءارى ەرەكشە بولعان وقۋ جىلى دا ءوز مارەسىنە جەتتى. بۇل وقۋ جىلى ايانباي قىزمەت ەتكەن ءار ءمۇعالىمنىڭ ەرەن ەڭبەگىمەن جانە ەرلىگىمەن ەسىمىزدە قالارى ءسوزسىز. مەكتەپتەرگە مۇلدەم جاڭا وقىتۋ ادىستەرىنە كوشۋ وڭايعا سوقپاعانىن ءبارى بىردەي تۇسىنە بەرمەيدى. وكىنىشكە قاراي، ءبىز ءداستۇرلى وقىتۋ فورماتىنا تولىقتاي كوشە المادىق. پاندەميانىڭ سالدارى ءبىلىم بەرۋ جۇيەسىنە ءالى دە اسەر ەتەتىنى انىق. دەگەنمەن ءسىز بارلىق قيىندىق پەن سىن-تەگەۋرىندەرگە قاراماستان، ساباقتارىڭىزدى ۇتىمدى ۇيىمداستىرىپ، مۇمكىندىگىنشە جاقسى ناتيجە كورسەتە الدىڭىز. ءسىز ۇستاز ماماندىعىنىڭ سەزىمتالدىق، بالالارعا دەگەن قامقورلىق جانە ادامگەرشىلىك سىندى ەڭ جاقسى قاسيەتتەرىن تانىتۋدىڭ جارقىن ۇلگىسىنە اينالدىڭىز، – دەپ جازدى مينيستر.
ونىڭ ايتۋىنشا، جۇمسالعان كۇش-جىگەرگە قاراماستان، قاشىقتان وقىتۋ كەزىندە ءارتۇرلى سەبەپتەرگە بايلانىستى ارتتا قالعان بالالاردىڭ بىلىمدەرى مەن باسقا وقۋشىلاردىڭ ءبىلىم دەڭگەيىن سالىستىرعاندا الشاقتىق بايقالادى.
– بۇل جاعدايدىڭ ورىن العانىنا بالالار كىنالى مە؟ ارينە، بالالاردىڭ ەش كىناسى جوق. ولار ءداستۇرلى فورماتتا ءبىلىم السا، ءسىزدىڭ قولداۋىڭىزدى سەزىنىپ، وزدەرىن كورسەتە الار ەدى دەپ سەنەمىن. ولارعا بۇل ولقىلىقتاردىڭ ورنىن تولتىرۋ ءۇشىن مۇمكىندىك بەرۋىمىز كەرەك پە؟ البەتتە. مەن، ءسىزدىڭ ارىپتەسىڭىز رەتىندە، ماماندىعىمىزعا ءتان قاسيەت – ىزگىلىككە ۇمتىلىپ، شاكىرتتەرىڭىزگە كومەك قولىن سوزۋىڭىزدى سۇرايمىن.
جىگەرلى ءارى العىر مەكتەپ وقۋشىلارىمەن جۇمىس ىستەۋ وڭايىراق. دەگەنمەن پاندەمياعا بايلانىستى وقۋ باعدارلاماسىنان قالىپ قويعان وقۋشىلارمەن جۇمىس جاساۋ وڭاي ەمەس. وقۋشىلاردىڭ ءبىلىمى بويىنشا ارتتا قالۋى ولاردىڭ مۇمكىندىكتەرى سونداي دەگەن ءسوز ەمەس. ءبىلىم بەرۋدەگى ولقىلىقتاردى قيىن جاعداي مەن وقۋشىلاردى جىگەرلەندىرۋ دەڭگەيىنىڭ جەتكىلىكسىزدىگىمەن سيپاتتاۋعا بولادى. مۇنداي بالالار ءقازىر بارلىق نازارىمىزدى قاجەت ەتەدى. ولاردىڭ الەۋەتى زور. سوندىقتان بالالارىمىزعا قولداۋ كورسەتۋىمىز كەرەك. بۇلدىرشىندەرىمىزدى ءوز قامقورلىعىڭىزعا الىپ، قيىندىقتارعا قاراماستان ولقىلىقتاردىڭ ورنىن قوسىمشا ساباقتار وتكىزۋ ارقىلى تولتىراسىزدار دەپ ۇمىتتەنەمىن. مەنىڭ بۇل ءوتىنىشىمدى قابىل الۋىڭىزدى سۇرايمىن، – دەدى ۆەدومستۆو باسشىسى.
سونىمەن قاتار مينيستر ايماعامبەتوۆ مۇعالىمدەردى جازعى مەكتەپتەردىڭ جۇمىسىنا 26 مامىر – 20 ماۋسىم ارالىعىندا بەلسەنە قاتىسۋعا شاقىردى.
– وسى جىلى سوڭعى قوڭىراۋ مەرەكەسىندە ەرەكشە سەزىمگە بولەنگەنىڭىزدى بىلەمىن. ويتكەنى ءبىر جاعىنان وقۋ جىلى اياقتالىپ جاتسا، ەكىنشى جاعىنان – جازعى مەكتەپتەر جۇمىس ىستەي باستادى. ءبىز مۇنداي جاعدايدىڭ قايتالانباۋى ءۇشىن قولدان كەلگەننىڭ ءبارىن جاسايتىن بولامىز. قاشىقتان ءبىلىم بەرۋ كەزىندە ارىپتەستەرىم الەۋمەتتىك جەلىلەردى بەلسەندى ءارى ەركىن مەڭگەرە باستاپ، ءوز ساباقتارىنا ويىن ەلەمەنتتەرىن ەنگىزە باستاعانىن ەرەكشە اتاپ وتكىم كەلەدى. ءبىز، ارينە، وسىنداي كاسىپقوي ماماندارىمىزدى ۇنەمى قولداپ، ولاردى باسقالار ءۇشىن ۇلگى ەتەمىز. بۇل ءۇردىس ۇمىتىلماي، كەرىسىنشە، ودان دا ۇلكەن اسەرگە يە بولادى دەپ ۇمىتتەنەمىن.
وقۋشىلارعا تاربيە بەرۋ ماسەلەسى ءمۇعالىم جۇمىسىندا وتە ماڭىزدى، سول سەبەپتى بۇل باعىتتا اتا-انالارمەن بىرلەسە جۇمىس جاسالۋى ءتيىس. ءسىز بالامەن ونىڭ جانىندا وتباسى مەن جاقىندارى بولمايتىن بوتەن ورتادا جۇمىس جاساپ، وقۋشىنىڭ بويىندا بولۋى مۇمكىن پروبلەمالارى تۋرالى اتا-انالارىنا دەر كەزىندە ايتا الاسىز. بالا وتباسىندا دا، مەكتەپتە دە وعان باسا نازار اۋدارىلاتىنىن سەزىنۋى كەرەك. بۇعان تەك اتا-انالارمەن تىعىز بايلانىستا، ولارمەن تەڭ جانە سەرىكتەستىك قارىم-قاتىناس قۇرۋ ارقىلى قول جەتكىزۋگە بولادى، – دەپ جازدى ايماعامبەتوۆ.
مينيستر مۇعالىمدەرگە بالالارمەن قارىم-قاتىناستا ەسكەرۋ كەرەك دۇنيەلەردى اتاپ ايتتى.
– بالالاردىڭ قىزىعۋشىلىعىن وياتىپ، ولاردى قاتەلىكتەرى ءۇشىن ايىپتاماڭىز. كەرىسىنشە، ورىن العان قاتەلىكتەرىن تۇزەتۋگە كومەكتەسىڭىز. سوڭى ساتتىلىككە ۇلاسپاعان ارەكەتتەرىنەن كەيىن ءۇمىت پەن سەنىمدى جوعالتپاۋعا ۇيرەتىڭىز. بالالار وزگەشە ويلاپ، ءوز پىكىرىن بىلدىرگەندەرى ءۇشىن ولاردىڭ ۇپايلارىن تومەندەتپەڭىز.
ءقازىر بالالارىمىز ولارعا بارىنشا تۇسىنىستىكپەن قاراعانىمىزدى اسا قاجەت ەتەدى. ولارعا ماحاببات پەن قامقورلىق قاجەت. ءبىز بۇلدىرشىندەرىمىزدىڭ مەكتەپكە بارىپ، ءبىلىم العاندارىن قالايمىز. سونىمەن قاتار بالالارىمىزدى باسقالارمەن سالىستىرعانىمىزدى توقتاتۋ كەرەك.
پاندەميا جاعدايى ءمۇعالىمنىڭ باستى قىزمەتى تەك اقپارات بەرۋ ەمەس، سونداي-اق ونىڭ باسقا دا مىندەتتەرىن ايقىنداپ بەردى. اتاپ ايتساق، بالالارعا قولداۋ كورسەتۋ، جاناشىرلىق تانىتۋ، ولاردى ىنتالاندىرۋ، كومەك قولىن سوزىپ، تالىمگەر بولۋ. بۇگىنگىنىڭ بالالارى مۇلدەم وزگەشە، ولار وزدەرىن ەركىن ۇستايدى. ەندىگى كەزەكتە ولاردىڭ بويلارىنداعى جاقسى قاسيەتتەردى ساقتاپ، ودان ءارى دامىتۋ - ءبىزدىڭ باستى مىندەتىمىز، – دەدى ول.
مينيستر حاتىنىڭ سوڭىندا ۆاكسيناسيا ناۋقانىندا بەلسەندى ازاماتتىق ۇستانىم تانىتىپ، ۆاكسيناسيا تۋرالى عىلىمي دەرەكتەردى تاراتۋ بارىسىندا كومەك كورسەتۋدى سۇرادى. سونداي-اق اتالعان تاقىرىپ اياسىنداعى جالعان اقپاراتپەن كۇرەسۋگە شاقىردى.
