قازاقستاننىڭ باس سانيتار دارىگەرى ەرلان قياسوۆ قازاقستاندىقتارعا ۇندەۋ جولدادى.

– الەم ەلدەرىن ىندەتتىڭ قايتا تارالۋى الاڭداتىپ وتىر. COVID-19 ۆيرۋسىنىڭ ءۇشىنشى تولقىنى ورىن الۋ ءقاۋپى تۋىندادى. اسىرەسە، ۆاكسيناسيا دەڭگەيى باياۋ ەلدەردە ۆيرۋستى جۇقتىرۋ كورسەتكىشى كۇرت ارتتى. جەر جۇزىندە 176 ميلليوننان استام ادام ۆيرۋس جۇقتىردى، كۇن سايىن 290 مىڭنان اسا جاڭا دەرەك تىركەلىپ وتىر. 3،8 ميلليوننان استام ادام كوز جۇمدى. قازاقستانمەن شەكارالاس ايماقتاردا قالىپتاسقان ءقاۋىپتى جاعداي ءبىزدى الاڭداتىپ وتىر. رەسەي مەن قىرعىزستاندا اۋرۋ تارالۋ كورسەتكىشى وتكەن جىلدان دا اسىپ ءتۇستى، – دەدى ول.

باس سانيتار دارىگەردىڭ ايتۋىنشا، ەلدە ەپيدەميولوگيالىق احۋال تۇراقتى، تۇرعىندار اراسىندا ۆيرۋس جۇقتىرۋ تومەندەگەن.

– جاز ايلارىندا ءبىزدىڭ كوپتەگەن وتانداستارىمىز الىس-جاقىنداعى شەت مەملەكەتتەرگە بارىپ دەمالۋعا اعىلادى. سونىڭ ىشىندە، سOVID-19-دىڭ تارالۋى بويىنشا ەپيدەميولوگيالىق احۋالى الاڭداتارلىق ەلدەر دە بار. مۇنى ەسكەرمەۋگە بولمايدى. شەتەلدە دەمالۋعا نيەتتى ازاماتتاردى ءوزىنىڭ جانە جاقىندارىنىڭ قاۋىپسىزدىگىن قامتاماسىز ەتۋگە شاقىرامىن.

ۆاكسيناسيا ءسىزدىڭ اعزاڭىزدىڭ ۆيرۋسقا قارسى قورعانىشىن قامتاماسىز ەتىپ، ساياحاتتى ءقاۋىپسىز وتكىزۋگە مۇمكىندىك بەرەدى. جازعى دەمالىستى الاڭداماي، ويداعىداي وتكىزۋ ءۇشىن COVID-19-عا قارسى ەكپە الىڭىز. ۆاكسيناسيا سىزگە اۋەجايلاردا ەش قيىندىقسىز ەلگە ورالۋىڭىزعا، ءارى ءوزىڭىز بەن جاقىندارىڭىزدى ءقاۋىپسىز سەزىنۋىڭىزگە مۇمكىندىك بەرەدى، – دەپ اتاپ ءوتتى قياسوۆ.