اتىراۋ وبلىسىنىڭ اكىمى ماحامبەت دوسمۇحامبەتوۆ ءبىرىنشى ورىنباسارىنىڭ كىناسى دالەلدەگەن جاعدايدا وتستاۆكاعا كەتۋگە دايىن ەكەنىن ايتتى. بۇل تۋرالى ول ورتالىق كوممۋنيكاسيالار قىزمەتىندە وتكەن ونلاين بريفينگتە مالىمدەدى.
– مەن تەرگەۋ مەن سوت پروسەسىنىڭ بارىسى تۋرالى پىكىر ايتا المايمىن. مەملەكەتتىك قىزمەت تۋرالى زاڭعا سايكەس، كەز كەلگەن ساياسي قىزمەتشىگە تىكەلەي باعىنىشتى قىزمەتكەر سىبايلاس جەمقورلىق ارەكەتى ءۇشىن ۇستالسا، ال ەڭ باستىسى، سوتتا ونىڭ كىناسى دالەلدەنسە، ونىڭ باسشىسى وتستاۆكاعا كەتۋى كەرەك. مەن دە وسى زاڭعا باعىنامىن. سوندىقتان ءتيىستى سوت شەشىمى شىقسا، ءبارىن زاڭ بويىنشا جاسايمىن، – دەدى وبلىس اكىم.
2020 جىلدىڭ قىركۇيەگىندە اتىراۋ وبلىسى اكىمىنىڭ ءبىرىنشى ورىنباسارى نۇرلان تاۋبايەۆ پەن وبلىستىق قۇرىلىس باسقارماسىنىڭ باسشىسى تيمۋر باساروۆ ۇستالعان بولاتىن.
كۇدىكتىلەرگە كۇلسارى قالاسىندا جاڭادان سالىنعان ەمحانا كەشەنىن قابىلداۋ تۋرالى اكتىلەرگە قول قويعانى ءۇشىن 185 ميلليون تەڭگە پارا الدى دەگەن ايىپ تاعىلعان. الايدا اكىم ورىنباسارى ءوزىنىڭ كىناسىز ەكەنىن ايتادى.
پىكىر قالدىرۋ