بۇگىن، 23 ماۋسىمدا پارلامەنت ءماجىلىسىنىڭ ەكس-دەپۋتاتى، مەملەكەت قايراتكەرى قۋانىش ماحمۇت ۇلى الپىسبەكوۆ 77 جاسقا قاراعان شاعىندا قايتىس بولدى. بۇل تۋرالى پارلامەنت ءماجىلىسىنىڭ باسپا ءسوز قىزمەتى حابارلادى.
ءماجىلىس ءتوراعاسى نۇرلان نىعماتۋلين مارقۇمنىڭ وتباسى مەن جاقىندارىنا كوڭىل ايتتى.
– ءماجىلىس دەپۋتاتتارىنىڭ اتىنان جانە جەكە ءوز اتىمنان ورنى تولماس قازاعا بايلانىستى مارقۇمنىڭ وتباسىنا، تۋعان-تۋىستارىنا جانە جاقىندارىنا كوڭىل ايتامىن. II سايلانعان پارلامەنت ءماجىلىسىنىڭ دەپۋتاتى رەتىندە قۋانىش ماحمۇت ۇلى الپىسبەكوۆ وتاندىق زاڭنامالىق بازانى جەتىلدىرۋگە سۇبەلى ۇلەس قوستى، – دەدى ءماجىلىس سپيكەرى.
سونىمەن قاتار نۇرلان نىعماتۋلين قۋانىش الپىسبەكوۆتىڭ كوكپ وك-دە، كەيىنىرەك كولىك مينيسترلىگىندە، اقمولا وبلىسىنىڭ باسشىلىعىندا، سونداي-اق پرەمەر-مينيستردىڭ كەڭسەسىندە جاۋاپتى مەملەكەتتىك لاۋازىمداردا جۇمىس ىستەگەن جىلدارداعى جوعارى كاسىبيلىگىنە توقتالدى.
– كورنەكتى مەملەكەت قايراتكەرى، كەرەمەت تۇلعا جانە سەنىمدى دوس قۋانىش ماحمۇت ۇلى تۋرالى جارقىن ەستەلىك ادامداردىڭ جۇرەگىندە ماڭگى ساقتالادى، – دەدى ول.
پىكىر قالدىرۋ