Daryn Online رەسپۋبليكالىق ءبىلىم بەرۋ پلاتفورماسىنىڭ ۇيىمداستىرۋىمەن "كارانتيندەگى ءبىلىم بەرۋ: قازاقستان جانە الەم" اتتى باسپا ءسوز كونفەرەنسياسى ءوتتى.

قازاقستاندىق وقۋشىلاردىڭ كارانتيندە العان ءبىلىمى قانداي دەڭگەيدە؟ ەلدەگى ونلاين ءبىلىم بەرۋ جۇيەسىنىڭ احۋالى قانداي؟ قازىرگى الەمدىك پاندەميا وقۋ پروسەسىنە قالاي ىقپال ەتتى؟ وقۋشىلار ءۇشىن وڭتايلى، ءتيىمدى ءبىلىم الۋ جۇيەسىنىڭ فورماسى قانداي؟ كونفەرەنسيادا وسى سەكىلدى وزەكتى سۇراقتارعا جاۋاپ بەرىلدى.

كونفەرەنسيادا Daryn Online ءبىلىم بەرۋ پلاتفورماسىنىڭ نەگىزىن قالاۋشى، يدەيا اۆتورى ايبەك قۋاتباي، جوبا كەڭەسشىسى سادىق شەرىمبەك، Daryn Online پلاتفورماسىنىڭ ديرەكتورى اسقار ماقسات پاندەميا كەزىندە ءبىلىم ساپاسىن جاقسارتۋ ءۇشىن تىڭ جوسپارلاردى العا تارتىپ، ءبىرقاتار ماسەلەلەردىڭ ءتۇيىنىن كورسەتتى.

– ەلدىڭ ەرتەڭى – سانالى ۇرپاق تاربيەلەۋدە ءبىلىم بەرۋ ءىسى ماڭىزدى ەكەنى بەلگىلى. ال، ءقازىر كۇللى الەم بەتپە-بەت كەلگەن قاشىقتان وقىتۋ جۇيەسى – ءسىز بەن ءبىزدى الاڭداتاتىن بۇگىنگى كۇننىڭ وزەكتى، وتكىر ماسەلەسى بولىپ وتىر. وتكەن جىلدان باستاپ زالالىن تيگىزگەن پاندەميا ءبىرقاتار ماماندىقتاردى شەتتەتىپ، جاڭا ۇدەرىس پەن ۇردىستەر قالىپتاستىردى. وسى ورايدا Daryn online ءبىلىم بەرۋ پلاتفورماسى ءبىلىم كوكجيەگىنە جاڭا بەلەستى باعىندىرۋدا ءبىراز ىقپال جاسادى. ميلليونداعان وقۋشى مەن مىڭداعان ۇستازدار ونلاين ءبىلىم بەرۋ جۇيەسىنە وڭاي ماشىقتاندى،– دەدى ايبەك قۋاتباي.

ءبىلىم پلاتفورماسى ءبىلىم ەكوجۇيەسىن قۇراستىرىپ، بارىنشا ساپالى قىزمەت كورسەتۋ ءۇشىن كۇش جۇمسايدى. ءبىرقاتار جاڭا جوبالاردى قولعا الىپ، ۋاقىت پەن قاشىقتىققا قاراماي وقۋشىلاردىڭ قاجەتتى ءبىلىم الۋىن قامتاماسىز ەتۋدە. وسى ورايدا جاڭاشىل ءبىلىمنىڭ جاندانۋىنا سەپ بولىپ وتىرعان ءبىلىم جانە عىلىم ءمينيسترى اسحات ايماعامبەتوۆكە زور العىستارىن بىلدىرەدى.

– الەمگە تونگەن ىندەتتىڭ ناتيجەسىندە ءبىز كوپتەن بەرى قولعا الۋ كەرەك بولعان جاڭا ۇردىسكە كوشتىك. بۇل – "ونلاين" ءۇردىس. الەمدىك ءبىلىم بەرۋ ادىستەرىنە قاراساق، ونلاين فورمات جەتكىلىكتى تۇردە دامىپ كەتكەن. سوندىقتان پاندەميا كەزىندە دە، ودان كەيىن دە قاشىقتان وقۋدىڭ پايداسى كوبىرەك. وسى ورايدا Daryn online پلاتفورماسى Daryn Tutor، Daryn Teacher، Horda، Daryn Tandau سەكىلدى جوبالاردى قولعا الىپ، كوپشىلىكتىڭ يگىلىگى ءۇشىن قىزمەت اتقارۋدا، – دەدى  Daryn online پلاتفورماسىنىڭ ديرەكتورى اسقار ماقسات.

باسپا ءسوز كونفەرەنسيا قورىتىندىسى بويىنشا، الداعى ۋاقىتتا اتقارىلاتىن جۇمىستار جانە جاسالىناتىن جوبالاردىڭ ۇستازدار مەن وقۋشىلار ءۇشىن تيىمدىلىگى ساراپتالدى. قازاقستاننىڭ ءبىلىم بەرۋ جۇيەسىن، وزات كورسەتكىشىن الەمنىڭ الپاۋىت مەملەكەتتەرىمەن تەڭەستىرۋ ءۇشىن ءبىرقاتار جولدار قاراستىرىلدى.

Daryn online  پلاتفورماسى 2018 جىلدان بەرى ونلاين رەجيمدە ساباقتار ءتۇسىرىپ، قاشىقتان ءبىلىم بەرۋ ءىسىن دامىتىپ كەلەدى. سونىمەن قاتار پلاتفورمادا وقۋشىلاردى ۇبت-عا، وليمپياداعا دايىنداۋ مەن مۇعالىمدەردى اتتەستاسيادان وتۋگە دايارلاۋ كۋرستارى قامتىلعان. بۇل ءبىلىم ساپاسىنىڭ دەڭگەيىن جوعارىلاتىپ، وسكەلەڭ ۇرپاقتىڭ الەۋەتىن كوتەرەدى.