دەنساۋلىق ساقتاۋ مينيسترلىگى ەلدە ءبىر تاۋلىكتە 2909 ادامنان كوروناۆيرۋس، 140 ادامنان كوروناۆيرۋس بەلگىلەرى بار پنيەۆمونيا انىقتالعانىن حابارلادى.

ءبىر تاۋلىكتە 32 ادام كوروناۆيرۋستان، 5 ادام پنيەۆمونيادان قايتىس بولعان.

ەلدە 2020 جىلعى 13 ناۋرىز بەن 2021 جىلعى 8 شىلدە ارالىعىندا رەسمي تۇردە 448 مىڭ ادامنان كوروناۆيرۋس تابىلعان. وسى ارالىقتا 57 630 ناۋقاستا پنيەۆمونيا راستالىپ، 3481 ادام قايتىس بولعان.

9 شىلدەدەگى مالىمەت بويىنشا، 36 723 ادام كوروناۆيرۋس ينفەكسياسىنان ەمدەلىپ جاتىر. ولاردىڭ ىشىندە 11 534 پاسيەنت ستاسيوناردا، 25 189 ناۋقاس امبۋلاتوريالىق دەڭگەيدە ەم قابىلداۋدا.

ىندەتكە شالدىققاندار اراسىندا 735 ادامنىڭ جاعدايى اۋىر، 169 پاسيەنتتىڭ جاعدايى وتە اۋىر، 93 ناۋقاس ءوجج اپپاراتىندا جاتىر.

قازاقستاندا "ءۇندى" شتاممىنىڭ تارالۋىنا بايلانىستى كوروناۆيرۋس قايتادان ءورشي تۇسكەن. كەشە دەنساۋلىق ساقتاۋ ءبىرىنشى ۆيسە-مينيسترى مارات شورانوۆ 1 شىلدەدە ءۇندى شتاممىن انىقتاۋ ءۇشىن 414 سىنامانىڭ پتر سكرينينگى وتكىزىلگەنىن، سونىڭ ناتيجەسى بويىنشا ءۇندى شتاممى بارلىق وبلىستار مەن نۇر-سۇلتان، الماتى، شىمكەنت قالالارىندا تابىلعانىن ءمالىم ەتتى.

ونىڭ سوزىنشە، "دەلتا شتاممىنىڭ" تارالۋىنان  سوڭعى ەكى اپتادا الدىڭعى ەكى اپتامەن سالىستىرعاندا رەسپۋبليكا بويىنشا بارلىق وڭىرلەردە اۋرۋعا شالدىعۋ دەڭگەيى 1،9 ەسە وسكەن. ول "دەلتا" شتاممىنىڭ جۇقپالىلىعى وتە جوعارى جانە انىقتالعان شتامدارعا قاراعاندا 60% جۇقپالى بولىپ كەلەتىنىن، ورتا ەسەپپەن 1 ادامنان 5-6 ادامعا جۇعاتىنىن ايتتى.

2021 جىلعى 9 شىلدەدەگى مالىمەت بويىنشا قازاقستاندا ۆاكسينانىڭI كومپونەنتىن 4 134 139 ادام، II كومپونەنتىن 2 336 019 ادام سالدىرعان.