ۆيسە-مينيستر، ءۇش سۋديا، بىرنەشە اكىم جانە مەن ولاردىڭ ورىنباسارلارى  جەمقورلىق فاكتىسىمەن ۇستالعان. بۇل تۋرالى سىبايلاس جەمقورلىققا قارسى قىزمەت باسشىسى مارات احمەتجانوۆ 6 ايداعى كورسەتكىشتەردى ءمالىم ەتۋ بارىسىندا ايتتى.

– جەدەل-تەرگەۋ جۇمىسى اياسىندا 6 ايدا 658 ادام قىلمىستىق جاۋاپكەرشىلىككە تارتىلدى، ولاردىڭ 61ء-ى رەسپۋبليكالىق جانە وبلىستىق دەڭگەيدەگى باسشى، ونىڭ ىشىندە ۆيسە-مينيستر جانە ءۇش سۋديا بار. 7 وڭىرلىك اكىم مەن ولاردىڭ ورىنباسارلارى اشكەرەلەندى. باسشىلاردىڭ جاۋاپكەرشىلىگىن كۇشەيتۋ ءۇشىن 33 لاۋازىمدى تۇلعا جازالاندى، ولاردىڭ ۇشەۋى جۇمىستان شىعارىلدى. بيۋدجەتكە 15 ميلليارد تەڭگە قايتارىلدى. بيزنەس ىستەرىنە زاڭسىز ارالاسۋدىڭ 60 جاعدايى جانە كولەڭكەلى ەكونوميكا سۋبەكتىلەرىنە "قامقورلىق جاساۋدىڭ" 45 دەرەگى تىركەلدى. جۇيەلى سىبايلاس جەمقورلىقتىڭ 61 فاكتىسى انىقتالدى، – دەدى مارات احمەتجانوۆ. 

سونىمەن قاتار "سەمەي ورمانى" رەزەرۆاتىنىڭ باس ديرەكتورى جانە ونىڭ ەكى ورىنباسارى باستاعان قىلمىستىق توپ قىزمەتى توقتاتىلعان. قازىرگى ۋاقىتتا بارلىق ءۇش باسشى قاماۋعا الىنىپ، تەرگەۋ ءجۇرىپ جاتىر.