وفلاين وقۋعا ورالۋ بارلىق سانيتارلىق-ەپيدەميولوگيالىق تالاپتاردى قاتاڭ ساقتاي وتىرىپ ورىندالۋى ءتيىس. بۇل تۋرالى "Nur Otan" پارتياسى جانىنداعى ءبىلىم مەن عىلىمدى دامىتۋ جونىندەگى رەسپۋبليكالىق قوعامدىق كەڭەس وتىرسىندا كەڭەس ءتوراعاسى، پارلامەنت ءماجىلىسىنىڭ دەپۋتاتى جۇلدىز سۇلەيمەنوۆا ءمالىم ەتتى، دەپ جازادى پارتيانىڭ باسپا ءسوز قىزمەتى.

ءماجىلىس بارىسىندا باس سانيتارلىق دارىگەر ەرلان قياسوۆ حابارلاعانداي، پەداگوگتار مەن قىزمەتكەرلەر 100% ۆاكسينالانعاندا عانا مەكتەپتەر ءداستۇرلى وقىتۋ فورماتىنا كوشە الادى.

– مەكتەپتەردەگى ساقتىق شارالارى بۇقارالىق ءىس-شارالاردى وتكىزۋگە تىيىم سالۋدى، سىنىپتاردى ءبولۋدى جانە ءارتۇرلى سىنىپتار ءۇشىن ءۇزىلىس ۋاقىتىن ءبولۋدى، اسحانادا تاماقتانۋ بارىسىنا باقىلاۋدى كۇشەيتۋدى قامتيدى. جوعارى وقۋ ورىندارىنا كەلسەك، 18 جاستان اسقان ستۋدەنتتەر دە ۆاكسينالانۋى نەمەسە قاشىقتان وقىتۋعا اۋىستىرىلۋى ءتيىس، – دەدى ەرلان قياسوۆ.

كەڭەس مۇشەسى، "رەسپۋبليكالىق فيزيكا-ماتەماتيكا مەكتەبى" كەاق باسقارما ءتوراعاسى عابيت بەكاحمەتوۆ وقۋشىلاردى باستاۋىش، ورتا جانە جوعارى مەكتەپ بلوكتارىنا ءبولۋدى ۇسىندى. كوروناۆيرۋس انىقتالعان جاعدايدا، كارانتينگە بۇكىل مەكتەپ ەمەس، ناقتى بلوك جابىلادى.

ءبىلىم جانە عىلىم ۆيسە-مينيسترى شولپان كارينوۆا 1 قىركۇيەكتەن باستاپ ەلدە 7 475 مەكتەپتى اشۋ جوسپارلانىپ وتىرعانىن جەتكىزدى.

قازاقستاندا "دەلتا شتاممىنىڭ" تارالۋى سالدارىنان سوڭعى ەكى اپتادا الدىڭعى ەكى اپتامەن سالىستىرعاندا رەسپۋبليكا بويىنشا بارلىق وڭىرلەردە اۋرۋعا شالدىعۋ دەڭگەيى 1،9 ەسە وسكەن. "دەلتا" شتاممىنىڭ جۇقپالىلىعى جوعارى جانە انىقتالعان شتامدارعا قاراعاندا 60% جۇقپالى، ورتا ەسەپپەن 1 ادامنان 5-6 ادامعا جۇعادى.

سوڭعى دەرەك بويىنشا ەلدە ءبىر تاۋلىكتە 2909 ادامنان كوروناۆيرۋس، 140 ادامنان كوروناۆيرۋس بەلگىلەرى بار پنيەۆمونيا انىقتالعان. ءبىر تاۋلىكتە 32 ادام كوروناۆيرۋستان، 5 ادام پنيەۆمونيادان قايتىس بولعان.