ءبىلىم جانە عىلىم مينيسترلىگى شىمكەنت قالاسىنىڭ ەكى جوعارى وقۋ ورنى باس ليسەنزياسىنان ايىرىلعانىن مالىمدەدى. ولار "وردا" (بۇرىنعى "Silkway حالىقارالىق ۋنيۆەرسيتەت") مەن "ميراس" ۋنيۆەرسيتەتى.
"2020 جىلى "وردا" جانە "ميراس" ۋنيۆەرسيتەتتەرىن تەكسەرۋ بارىسىندا ءبىلىم بەرۋ سالاسىنداعى زاڭنامانى ورەسكەل بۇزۋشىلىقتار انىقتالدى. ەكى جوعارى وقۋ ورنىنىڭ قىزمەتى توقتاتىلىپ، ولارعا انىقتالعان بۇزۋشىلىقتاردى جويۋعا ۋاقىت بەرىلدى. الايدا جوعارى وقۋ ورىندارى قاتەلىكتەرمەن جۇمىس جۇرگىزبەي، 8 اي كوميتەتتىڭ ليسەنزيانى توقتاتا تۇرۋ تۋرالى شەشىمىنە شاعىمدانۋمەن اينالىستى. ءبىراق سوڭىندا سوت كوميتەتتىڭ شەشىمىن كۇشىندە قالدىرۋ تۋرالى شەشىم قابىلدادى. ال ۋنيۆەرسيتەتتىڭ كوپتەگەن شاعىمدارى قاناعاتتاندىرىلمادى" دەلىنگەن حابارلامادا.
مامىر ايىندا قايتا تەكسەرۋ قورىتىندىسى بويىنشا قاتەلىكتەرمەن جۇمىس جۇرگىزىلمەگەنى انىقتالعان.
– ەڭ باستى ماسەلە كادرلاردى دايارلاۋ ساپاسىندا بولدى. مىسالى، "وردا" ۋنيۆەرسيتەتىندە وقيتىنداردىڭ 97%-ى شەكتى بالدان وتە المادى جانە وقۋ پروسەسىندە الىنعان ءبىلىم مەن قۇزىرەتتەردىڭ جەتكىلىكتى دەڭگەيىن راستاي المادى. ەكى جوو-دا كەستەگە سايكەس جاپپاي ساباق وتكىزبەۋ فاكتىلەرى انىقتالدى. اعىمداعى باعالار قويىلماعان، بەكىتىلگەن كەستەگە سايكەس ەمتيحاندار وتكىزىلمەگەن، پاندەر تولىق كولەمدە وقىتىلماعان.
ءتيىستى 5 كرەديتتىڭ ورنىنا تەك 3 كرەديت يگەرىلدى. بارلىق ءپان وقۋ-ادىستەمەلىك ماتەريالدارمەن قامتاماسىز ەتىلمەگەن. وقىتۋشىلاردىڭ بەكىتىلگەن پەداگوگيكالىق جۇكتەمەسى مەن ونىڭ ناقتى ورىندالۋى اراسىندا ۇلكەن ايىرماشىلىقتار بار، ياعني وقىتۋشىدا جۇكتەمەدە بەلگىلى ءبىر ءپان بويىنشا ءدارىس وقۋ جوسپارلانۋى مۇمكىن، ال ءىس جۇزىندە ول ونى وقىمايدى، – دەپ اتاپ ءوتتى بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ جوعارى جانە جوعارى وقۋ ورنىنان كەيىنگى ءبىلىم بەرۋ سالاسىنداعى باقىلاۋ باسقارماسىنىڭ باسشىسى ەلۆيرا ساپاربەكوۆا.
پىكىر قالدىرۋ