قازاقستان مۇسىلماندارى ءدىني باسقارماسىنىڭ باسشىسى، باس ءمۇفتي ناۋرىزباي قاجى تاعان ۇلى قۇربان ايت قارساڭىندا كاسىپكەرلەرگە ۇندەۋ ايتتى.

– مۇسىلمان قاۋىمىنىڭ ۇلىق مەيرامى – قۇربان ايتقا ساناۋلى كۇندەر قالدى. ۇلىق كۇندە ءيسى مۇسىلمان بالاسى شىنايى نيەتپەن قۇربان شالىپ، قۇرباندىق ەتىن مۇگەدەكتەر مەن جەتىمدەرگە، كوپبالالى وتباسىلار مەن قارتتارعا تاراتىپ، العىسىن الۋعا تىرىسادى. ادامنىڭ العىسىن الىپ، باتاسىنا بولەنۋ – ساۋاپتى ءىستىڭ ءبىرى، – دەدى باس ءمۇفتي. 

ناۋرىزباي قاجى تاعان ۇلى ەلدەگى بارشا شارۋا قوجالىقتارىنىڭ قوجايىندارىنا مال قۇنىن كوتەرمە باعاسىز جانە كاسىپكەرلەر ازىق-تۇلىك باعاسىنا جەڭىلدىكتەر جاساۋدى سۇرادى.

– ايت كۇندەرى حالىق تاراپىنان مال ساتىپ الۋعا دەگەن سۇرانىستىڭ ارتا تۇسەتىنى بەلگىلى. وسى رەتتە ەلدەگى بارشا شارۋا قوجالىقتارىنىڭ قوجايىندارىن ۇلىق مەيرام – قۇربان ايتتىڭ قۇرمەتىنە مال قۇنىن شارىقتاتپاي، حالىققا وڭتايلى باعانى ۇسىنۋعا شاقىرامىن. سونىمەن قاتار، بارشا كاسىپكەرلەردى تۇرعىندار كۇندە تۇتىناتىن الەۋمەتتىك ماڭىزى بار ازىق-تۇلىك باعاسىنا مۇمكىندىگىنشە جەڭىلدىك جاساۋعا ۇندەيمىن، – دەدى ول.