12 شىلدەدە 3693 ادامنىڭ پتر تەستى وڭ ناتيجە كورسەتكەن. 19 ادامنان پنيەۆمونيا انىقتالعان. 11 شىلدەدە 35 ادام كوروناۆيرۋستان، 6 ادام پنيەۆمونيادان كوز جۇمعان. بۇل تۋرالى دەنساۋلىق ساقتاۋ مينيسترلىگىنىڭ ەپيدەميولوگيالىق احۋال تۋرالى كۇندەلىكتى اقپاراتتىق حابارلاماسىندا ايتىلدى.
ەل بويىنشا كوروناۆيرۋسقا تاپسىرعان تەستى وڭ ناتيجە كورسەتكەن جاعدايلار سانى 462 417-گە جەتتى. ونىڭ ىشىندە 4717 ادام قايتىس بولعان. كوروناۆيرۋس بەلگىلەرى بار پنيەۆمونيامەن اۋىرعانداردىڭ رەسمي سانى – 57 919. ونىڭ 3498ء-ى كوز جۇمعان.
ۆيرۋستىڭ تارالۋى اسىرەسە نۇر-سۇلتان (978)، الماتى (535)، شىمكەنت (169) قالالارىندا، قاراعاندى (596)، اتىراۋ (334)، باتىس قازاقستان وبلىستارىندا (142) ءورشىپ تۇر.
13 شىلدەدەگى مالىمەت بويىنشا، 43 835 ادام كوروناۆيرۋس پەن پنيەۆمونيادان ەمدەلىپ جاتىر. ولاردىڭ ىشىندە 14 027 پاسيەنت ستاسيوناردا، 29 808 ناۋقاس امبۋلاتوريالىق دەڭگەيدە ەم قابىلداۋدا.
ىندەتكە شالدىققاندار اراسىندا 846 ادامنىڭ جاعدايى اۋىر، 193 پاسيەنتتىڭ جاعدايى وتە اۋىر، 106 ناۋقاس ءوجج اپپاراتىندا جاتىر.
قازاقستان وڭىرلەرىندەگى ەپيدەميولوگيالىق احۋالدى باعالاۋ ماتريساسىنا سايكەس، نۇر-سۇلتان، الماتى، شىمكەنت قالالارى، اقمولا، اقتوبە، اتىراۋ، باتىس قازاقستان، قاراعاندى، قوستاناي، ماڭعىستاۋ، پاۆلودار جانە سولتۇستىك قازاقستان وبلىستارى "قىزىل" ايماقتا. الماتى، جامبىل جانە قىزىلوردا وبلىستارى "سارى" ايماقتا، تۇركىستان جانە شىعىس قازاقستان وبلىستارى "جاسىل" ايماقتا.
12 شىلدەدە قازاقستان اۋماعىندا كوروناۆيرۋس ينفەكسيانىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا "قىزىل ايماقتاعى" وڭىرلەردە كارانتين شەكتەۋلەرىن كۇشەيتۋ تۋرالى شەشىم قابىلدادى.
وعان ساي:
- "Ashyq" جوباسىنا قاتىساتىن وبەكتىلەردى قوسپاعاندا، قالاارالىق، وبلىسىشىلىك، قالالىق تۇراقتى جانە تۇراقتى ەمەس (تۋريستىك) اۆتوبۋس جانە شاعىن اۆتوبۋس تاسىمالدارى، جابىق جاعاجايلار مەن اكۆاپاركتاردىڭ قىزمەتى توقتاتىلادى.
دەمالىس جانە مەرەكە كۇندەرى:
- قوعامدىق كولىكتىڭ؛
- "Ashyq" جوباسىنا قاتىسۋشىلاردى قوسپاعاندا، قوعامدىق تاماقتانۋ وبەكتىلەرىنىڭ؛
- "Ashyq" جوباسىنا قاتىساتىنداردى قوسپاعاندا، فيتنەس-ورتالىقتاردىڭ، فيتنەس-كلۋبتاردىڭ، يوگا-ورتالىقتارىنىڭ، سپورتتىق-ساۋىقتىرۋ وبەكتىلەرىنىڭ، ساۋنالاردىڭ، سپا-ورتالىقتاردىڭ، باسسەيندەردىڭ؛
- "Ashyq" جوباسىنا قاتىساتىنداردى قوسپاعاندا، كينوتەاترلاردىڭ، تەاترلاردىڭ، كونسەرت زالدارىنىڭ، فيلارمونيالاردىڭ، كومپيۋتەرلىك كلۋبتاردىڭ، بوۋلينگتەردىڭ، بيلياردتىڭ، كاراوكەنىڭ، كورمەلەردىڭ؛
- "Ashyq" جوباسىنا قاتىسۋشىلاردى، اشىق بازارلاردى، جارمەڭكەلەردى قوسپاعاندا، اۋدانى 2000 م2 دەيىنگى ازىق-تۇلىك ەمەس تاۋارلاردى وتكىزۋ جونىندەگى وبەكتىلەردىڭ؛
- "Ashyq" جوباسىنا قاتىسۋشىلاردى قوسپاعاندا، سپورت وبەكتىلەرىنىڭ (سپورت كەشەندەرى، سپورت مەكتەپتەرى، سپورت كلۋبتارى، جاتتىعۋ زالدارى)؛
- ءبىلىم بەرۋ ورتالىقتارىنىڭ، بالالار مەن ەرەسەكتەرگە ارنالعان ۇيىرمەلەردىڭ، بالالاردى دامىتۋ ورتالىقتارىنىڭ؛
- "Ashyq" جوباسىنا قاتىساتىنداردى قوسپاعاندا، فۋدكورتتاردىڭ قىزمەتىنە تىيىم سالىنادى!
جۇمىس كۇندەرى قىزمەتتەرى شەكتەلەدى:
- "Ashyq" جوباسىنا قاتىساتىن فيتنەس-ورتالىقتاردىڭ، فيتنەس-كلۋبتاردىڭ، يوگا-ورتالىقتاردىڭ، سپورتتىق-ساۋىقتىرۋ وبەكتىلەرىنىڭ، ساۋنالاردىڭ، سپا-ورتالىقتاردىڭ، سپورت وبەكتىلەرىنىڭ، باسسەيندەردىڭ قىزمەتى 20-00 ساعاتقا دەيىن؛
- وسو، ساۋدا ۇيلەرىنىڭ، ساۋدا جەلىلەرىنىڭ "Ashyq" جوباسىنا قاتىسۋىنا قاراماستان ساعات 18-00-گە دەيىن؛
- "Ashyq" جۇيەسىنە قاتىساتىن قوعامدىق تاماقتانۋ نىساندارى، فۋدكورتتار – ساعات 20-00 دەيىن؛ - "Ashyq" جۇيەسىنە قاتىسپايتىندار ساعات 18-00-گە دەيىن.
2021 جىلعى 13 شىلدەدەگى مالىمەت بويىنشا قازاقستاندا ۆاكسينانىڭ I كومپونەنتىن 4 486 677 ادام، II كومپونەنتىن 2 490 517 ادام سالدىرعان.
