پرەزيدەنت قاسىم-جومارت توقايەۆ ەپيدەميولوگيالىق احۋال جونىندە كەڭەستە كوروناۆيرۋس ينفەكسياسىن جۇقتىرىپ جاتقاندار سانى كوبەيىپ جاتقانىن ايتتى.

– سوڭعى كەزدە كوروناۆيرۋس جۇقتىرعانداردىڭ سانى كۇرت ارتىپ كەتتى. كۇن سايىن 5 مىڭنان استام ناۋقاس تىركەلۋدە. ءبىر اپتا بۇرىن وسى ماسەلەنى ۇكىمەتتىڭ كەڭەيتىلگەن وتىرىسىندا قاراستىردىق. سول كەزدە ۇكىمەت احۋالدى باقىلاۋدا ۇستاپ وتىرمىز دەپ مالىمدەگەن بولاتىن.

ءبىراق، وكىنىشكە قاراي، جاعداي جاقساراتىن ەمەس. كەرىسىنشە، ەپيدەميولوگيالىق احۋال ناشارلاپ بارادى. اسىرەسە، ەلورداداعى جاعداي وتە كۇردەلى، – دەدى توقايەۆ. 

ول وڭىرلەردىڭ باسىم بولىگى قىزىل ايماقتا ەكەنىنە، اۋىر جانە اسا اۋىر جاعدايداعى ناۋقاستاردىڭ سانى كۇن سايىن كوبەيىپ بارا جاتقانىنا الاڭداۋشىلىق ءبىلدىردى.

– ەڭ وكىنىشتىسى، ازاماتتارىمىزدان ايىرىلىپ جاتىرمىز. سوندىقتان شۇعىل تۇردە ءىس-شارالاردى قولدانۋىمىز كەرەك. ءتيىستى جۇمىس جوسپارىن دايىنداپ، ونى مىندەتتى تۇردە ىسكە اسىرۋىمىز قاجەت.

ءبىزدىڭ ەڭ وزەكتى ماقساتىمىز – ۆيرۋستىڭ تارالۋىن توقتاتۋ ەمەس. الەمدىك تاجىريبە مۇنىڭ مۇمكىن ەمەس ەكەنىن كورسەتىپ وتىر. ەڭ باستىسى – اسا اۋىر ناۋقاستاردىڭ كوبەيۋىن بولدىرماۋ، ادام ءومىرىن ساقتاۋ. سوندىقتان، ونىڭ ءبىر عانا جولى بار. بۇل – جاپپاي ۆاكسيناسيا، ەكپە سالۋ، – دەپ اتاپ ءوتتى توقايەۆ.