قازگيدرومەت 27-29 شىلدەگە ارنالعان اۋا رايى بولجامىن جاريالادى.

سينوپتيكتەردىڭ حابارلاۋىنشا، اپتانىڭ باسىندا ماسكەۋ اۋداندارىنان كەلەتىن انتيسيكلون ەلدىڭ كوپ بولىگىنە اسەر ەتەدى. سالقىن اۋا ماسسالارى اسەرىنەن كۇن سالقىندايدى، نەگىزىنەن جاۋىن-شاشىنسىز اۋا رايى كۇتىلەدى.

"تۇندە اۋا تەمپەراتۋراسى سالقىن، ال كۇندىز قالىپتى بولادى دەپ كۇتىلەدى. ال رەسپۋبليكا اۋماعىنداعى اۋا رايى تومەن قىسىمدى الاڭعا بايلانىستى وزگەرەدى. وسىلايشا 28 شىلدەدە باتىس پەن شىعىستا، 28-29 شىلدەدە قازاقستاننىڭ سولتۇستىگىندە، سولتۇستىك-باتىسى جانە وڭتۇستىك جارتىسىندا، 29 شىلدەدە ورتالىقتا كۇن كۇركىرەپ، ەكپىندى جەل سوعىپ، وتكىنشى جاڭبىر، سونداي-اق بۇرشاق جاۋادى دەپ بولجانادى" دەلىنگەن "قازگيدرومەت" رمك حابارلاماسىندا.

ەلدىڭ سولتۇستىك-باتىسى مەن سولتۇستىگىندە اۋا تەمپەراتۋراسى تۇندە 8-16، ال كۇندىز 17-30 گرادۋسقا تومەندەيدى. ورتالىقتا جانە شىعىستا تۇندە 8-18 گرادۋسقا دەيىن، كۇندىز 22-30 گرادۋسقا دەيىن جىلى بولادى.