تەننيستەن قازاقستاننىڭ ءبىرىنشى راكەتكاسى ەلەنا رىباكينا توكيو وليمپياداسىندا شيرەك فينالدا يسپاندىق گاربينە مۋگۋرۋسانى جەڭىپ، جارتىلاي فينالعا شىقتى. وسى ورايدا، تەننيسشى بۇگىنگى ماچتى تۋرالى ويىن ءبولىستى، دەپ جازادى Olympic.kz سايتى. 

– مەنىڭ بۇگىنگى قارسىلاسىم وتە تاجىريبەلى. سوندىقتان ماچ قيىن ءوتتى. مەن جەڭىسكە جەتەم دەگەن ويمەن شىقتىم. الدىڭعى ماچتاردا جوق جەردەن قاتەلەسىپ، كەرەك ەمەس جەردە ۇپاي جوعالتتىم. بۇگىنگى ويىندا سول قاتەلىكتەردى جىبەرمەۋگە تىرىستىم.

قارسىلاسقا مۇمكىندىك بەرمەۋ ءۇشىن بارىمدى سالدىم. سول سەبەپتى، بۇگىنگى جەڭىسىم ءۇشىن وتە قۋانىشتىمىن. جارتىلاي فينالداعى قارسىلاسىممەن بۇرىن ويناپ كورمەگەم. تەك جاتتىعۋ كەزدەرىندە عانا جولىمىز ءتۇيىسىپتى.

الداعى ويىن دا وڭاي بولمايدى. دوپتى ويىنعا ءساتتى قوسۋ ارقىلى ۇپاي جيناۋعا تىرىسامىن. سەبەبى، بۇل مەنىڭ قولىمنان كەلەدى، – دەدى رىباكينا.