باتىس قازاقستان وبلىسى ماحامبەت اۋىلىنىڭ اكىمى بەيبىت امانعالييەۆتىڭ ۇستىنەن ءىس قوزعالدى. بۇل تۋرالى "موي گورود" سايتى حابارلادى.
29 شىلدەدە مەملەكەتتىك قىزمەت ىستەرى دەپارتامەنتى اكىمنىڭ ۇستىنەن تارتىپتىك ءىس قوزعالعانىن حابارلادى. ۆەدومستۆونىڭ باس مامانى داۋرەن قايىروۆتىڭ ايتۋىنشا، بايتەرەك اۋدانى ماحامبەت اۋىلدىق وكرۋگىنىڭ تۇرعىنى اكىمنىڭ ۇستىنەن ارىزدانعان. اكىم بەيبىت امانعالييەۆ وعان ءتىل تيگىزىپ، ار-نامىسى مەن قادىر-قاسيەتىن قورلايتىن ءسوز ايتقان.
– اۋىل تۇرعىندارىنىڭ جينالىسى كەزىندە اكىم (بەيبىت امانعالييەۆ-رەد) مەن تاڭجارىقوۆا (شاعىمدانۋشى-رەد) اراسىندا جانجال تۋىنداعان. ارتىنان اكىم باسقا ءبىر ادامعا WhatsApp مەسسەندجەرى ارقىلى داۋىستىق اۋديوحابارلاما جىبەرگەن. وندا ايەلدىڭ ار-نامىسىنا تيەتىن ادەپسىز سوزدەر ايتىلعان. كەيىن اۋديوجازبا ايەلدىڭ قولىنا تۇسكەن. بالاعات ءسوز بولماعان، ءبىراق ار-نامىسى مەن قادىر-قاسيەتىنە نۇقسان كەلتىرەتىن سوزدەر ايتىلعان، – دەدى د. حايروۆ.
تالقىلاۋ ناتيجەسىندە ادەپ جونىندەگى كەڭەس بەيبىت امانعالييەۆتكە شارا قولدانىپ، وعان "قاتاڭ سوگىس" جاريالاۋ تۋرالى شەشىم قابىلدادى.
اكىم بەيبىت امانعالييەۆ مەملەكەتتىك قىزمەتتە 11 جىلدان بەرى ىستەپ كەلەدى. شەنەۋنىك اتالعان جايت بويىنشا ءوز قاتەلىگىن مويىنداپ، ەشبىر جاعدايدا اۋىل تۇرعىندارىن رەنجىتكىسى كەلمەيتىنىن ايتتى.
بۇعان دەيىن، بقو بايتەرەك اۋدانى يانيكينو اۋىلىنىڭ اكىمى اۋعان المۋرزينگە قاتىستى ءىس قوزعالعان. ول كولىك قۇرالىن ماس كۇيىندە باسقارعانى ءۇشىن 15 تاۋلىككە قاماۋعا الىنىپ، 7 جىلعا كولىك جۇرگىزۋ قۇقىعىنان ايىرىلعان. وسىلايشا، ادەپ جونىندەگى كەڭەستە شەنەۋنىكتى قىزمەتىنەن بوساتۋ تۋرالى شەشىم قابىلدانعان.
پىكىر قالدىرۋ