توكيو وليمپياداسىندا گرەك-ريم كۇرەسىنەن باسەكەلەر جالعاسىپ جاتىر. ۇلتتىق قۇرامانىڭ باس باپكەرى باقتيار بايسەيىتوۆ شاكىرتتەرىنىڭ جەڭىلىسىن جاتتىقتىرۋشىلاردىڭ تاپسىرماسىن ورىنداماعانىمەن ءتۇسىندىردى، دەپ حابارلادى  Olympic.kz.

– كەشە مەيرامبەك ايناعۇلوۆ جاتتىقتىرۋشىلار تاپسىرماسىن ورىندامادى. ءبىز قاتاڭ ەسكەرتىپ، تىيىم سالعان ءادىس-تاسىلدى كىلەمگە شىققان ساتتە-اق ىستەپ، ءوز قاتەسىنىڭ كەسىرىنەن قارسىلاسىنا جول بەردى. بىزگە ىڭعايلى بولاتىنداي كۇرەس ءستيلىن ءتۇسىندىرىپ، وعان جەتكىزگەنىمىزبەن، ءبىزدىڭ تاپسىرمامىزدى كىلەمگە شىققاندا ورىنداعان جوق. 

بۇگىن دەمەۋ جادىرايەۆ بەلدەسۋدى ۇپاي سانىمەن جەڭىپ تۇرعان بولاتىن. بەلدەسۋدىڭ سوڭعى ساتىندە قارسىلاسىنا ەسە جىبەردى. 30 سەكۋندتىق ءۇزىلىس بولعان كەزدە ءبارىن ءتۇسىندىرىپ، بەلدەسۋدى سوڭىنا دەيىن بەرمەي، باقىلاۋعا الۋ كەرەگىن ايتتىق. دەمەۋدىڭ ءدال وسىلاي سوڭعى ساتتە ادىسكە ءتۇسىپ، قارسىلاسىنا ۇپاي سىيلاعانىن ءبىز دە تۇسىنە المادىق.

ەرتەڭ نۇرسۇلتان تۇرسىنوۆ بەلدەسەدى. كۇرەستىڭ قانداي بولاتىنىن كىلەم كورسەتەدى، – دەيدى باس باپكەر باقتيار بايسەيىتوۆ.

گرەك-ريم كۇرەسىنەن وليمپيادا ويىندارىنا قازاقستان ءۇش جولداما جەڭىپ العان. 60 كەلىدە مەيرامبەك ايناعۇلوۆ، 77 كەلىدە دەمەۋ جادىرايەۆ قاتىسىپ، العاشقى اينالىمدا جەڭىلىسكە ۇشىرادى. ەرتەڭ، 3 تامىز كۇنى 87 كەلىگە دەيىنگى سالماق دارەجەسىندە نۇرسۇلتان تۇرسىنوۆ كۇرەسەتىن بولادى.