2 تامىزدا نۇر-سۇلتان قالاسىنىڭ باس سانيتار دارىگەرى ج. پرالييەۆانىڭ جاڭا قاۋلىسى كۇشىنە ەندى. قۇجاتتا ەلوردانىڭ ءبىرقاتار كاسىپكەرلىك نىساندارىنىڭ جۇمىس ءتارتىبى جازىلعان.

جاڭا قاۋلىعا سايكەس، ءدارىحانالاردان، ازىق-تۇلىك دۇكەندەرىنەن، بايلانىسسىز جولمەن قىزمەت كورسەتەتىن نىسانداردان باسقا "Ashyq" جوباسىنا قاتىسپايتىن كاسىپكەرلىك نىسانداردىڭ كوپشىلىگىنىڭ جۇمىسىنا تىيىم سالىنعان.

سونىمەن قاتار ساۋدا ويىن-ساۋىق ورتالىقتارىنا، ساۋدا ۇيلەرى مەن قالا ورتالىقتارىنا كىرۋ تەك "Ashyq" جۇيەسىندەگى QR-كودتى سكانەرلەۋ ارقىلى جۇزەگە اسىرىلادى. بۇل نىسانداردىڭ جۇمىس كەستەسى — تاڭعى ساعات 7-دەن 20:00-گە دەيىن. سەنبى جانە جەكسەنبى كۇندەرى نىساندار جۇمىسىنا تىيىم سالىنادى.

"فۋدكورتتار جۇمىسىنا سەنبى جانە جەكسەنبى كۇندەرى تىيىم سالىنعان. ال دۇيسەنبى-جۇما كۇندەرى ادام سانىن 50 ورىننان اسىرماي ساعات 7.00-دەن 20.00-گە دەيىن "Ashyq" جوباسى ارقىلى جۇمىس ىستەي الادى. جۇمىس جانە دەمالىس كۇندەرى ساعات 7.00-دەن 20.00-گە دەيىن تاماق جەتكىزۋگە جانە وزىمەن الىپ شىعۋعا رۇقسات ەتىلەدى. ءتۇرلى اكسيالار، جارمەڭكەلەر، شوۋرۋمدار مەن ۇتىس ويىندارىن (ونلاين-فورماتتى قوسپاعاندا) وتكىزۋگە تىيىم سالىنادى" دەلىنگەن قاۋلىدا.

"Ashyq" جوباسىنا قاتىسپايتىن قوعامدىق تاماقتانۋ ورىندارى — مەيرامحانالار، كافەلەر، كوفەحانالار، اسحانالار ورنالاسقان جەرىنە قاراماستان تاماق جەتكىزۋ نەمەسە الىپ شىعۋ قىزمەتتەرىن كورسەتە الادى. "Ashyq" جوباسىنا قاتىسۋشىلارعا تەك دۇيسەنبى-جۇما كۇندەرى ساعات 07.00-دەن 20.00-گە دەيىن جۇمىس ىستەۋىنە رۇقسات ەتىلەدى. بۇل رەتتە مەكەمەنىڭ ىشىندە جانە اشىق اۋادا تولتىرىلۋى 50 پايىزدان، ورىندار سانى 50-دەن اسىپ كەتپەۋى كەرەك.