ۇلىبريتانيا مەن اقش ەكى ادام قازا تاپقان تانكەر شابۋىلىن "يران ۇيىمداستىردى" دەپ ايىپتاپ، مۇنى حالىقارالىق قۇقىقتىڭ بۇزىلۋى رەتىندە باعالادى. سونداي-اق جاۋاپ بەرۋگە ۋادە بەردى.

بەيسەنبى كۇنى ومان ماڭىندا يزرايلدىكتەرگە تيەسىلى فيرما باسقاراتىن "MV Mercer Street" تانكەرىنە شابۋىل جاسالعان.

شابۋىلدا ۇلىبريتانيا ازاماتى مەن رۋمىنيا ازاماتى قازا تاپقان.

يزرايل پرەمەر ء-مينيسترى نافتالي بەننەتت بۇل شابۋىلعا تەگەراننىڭ جاۋاپتى ەكەنىن مالىمدەدى.

بەننەتت "ءبىز يرانعا ءوز جولىمىزبەن قالاي حابارلاما جىبەرۋ كەرەكتىگىن بىلەمىز" دەپ ەسكەرتتى. ال تەگەران بۇل جاعدايلاردىڭ ءبارىن "نەگىزسىز ايىپتاۋ" دەيدى.

سوڭعى بىرنەشە اي بويى يزرايل مەن يران باسقاراتىن كەمەلەرگە بىرنەشە رەت شابۋىل جاسالدى.

يران سونىمەن قاتار ءيزرايلدى "يادرولىق نىساندار مەن عالىمداردى نىساناعا الدى" دەپ ايىپتادى.

ۇلىبريتانيانىڭ سىرتقى ىستەر ءمينيسترى دومينيك رااب جەكسەنبىدە جاساعان مالىمدەمەسىندە، يراننىڭ "MV Mercer Street"-كە قارسى ءبىر نەمەسە بىرنەشە درونىن قولدانعانىن جاريالادى. لوندون تەگەراننىڭ بۇل وپەراسيانى "ادەيى، ماقساتتى تۇردە" جاساعانىن ايتتى جانە "حالىقارالىق قۇقىقتىڭ ايقىن بۇزىلۋى" دەپ باعالادى.

– يران مۇنداي شابۋىلداردى توقتاتۋى كەرەك جانە كەمەلەرگە ەركىن جۇزۋگە رۇقسات بەرۋى كەرەك، – دەيدى دومينيك رااب.

اقش مەملەكەتتىك حاتشىسى انتوني بلينكەن "شابۋىلدى يراننىڭ جاساعانىنا سەنەتىنىن" جانە "ءتيىستى جاۋاپ" بولاتىنىن ايتتى.