نۇر-سۇلتان قالاسىنداعى ينفەكسيالىق ستاسيونارلاردا ناۋقاستار كوبەيگەن، ءاربىر ەكىنشى ناۋقاسقا وتتەگى كونسەنتراتورى قاجەت.

قالا اكىمشىلىگىنىڭ حابارلاۋىنشا، كوۆيدتىك اۋرۋحانالاردا وزدىگىنەن دەمالۋعا ءالى جوق 40 ادام وكپەنى جاساندى جەلدەتۋ اپپاراتىندا جاتىر. تەك وتكەن تاۋلىكتە عانا ينفەكسيالىق ستاسيونارلارعا 178 ادام جاتقىزىلعان. توسەكتەر بىردەن تولىپ جاتىر. ءاربىر ەكىنشى ناۋقاسقا وتتەگى كونسەنتراتورى قاجەت، ولار ءينۆازيۆتى ەمەس جەلدەتۋدە جاتىر. ال جاعدايى تىم ناشارلار وكپەنى جاساندى جەلدەتۋ اپپاراتىنا قوسىلعان.

دارىگەرلەر جاعدايى اۋىر ناۋقاستاردىڭ باسىم بولىگى ەكپە الماعان، ونىمەن قوسا سانيتارلىق تالاپتاردى ەلەمەي، سالتاناتتى ءىس-شارالارعا قاتىسقان نەمەسە ۇيىمداستىرعان ازاماتتار ەكەنىن ايتادى.

2 تامىزداعى جاعداي بويىنشا نۇر-سۇلتان قالاسىنىڭ ينفەكسيالىق ستاسيونارلارىندا 2903 ناۋقاس جاتىر. رەانيماسيادا 260 ادام، 40 پاسيەنت ءوجج اپپاراتىنا قوسىلعان.