دەنساۋلىق ساقتاۋ ءمينيسترى الەكسەي سوي قازاقستاندا كوروناۆيرۋسقا قارسى ريەۆاكسيناسيانىڭ قاشان باستالاتىنىن ايتتى. بۇل تۋرالى Coronavirus2020.kz Telegram ارگاسىندا حابارلاندى.

– ءقازىر تاسىلدەرىن قاراستىرىپ جاتىرمىز. ول ەكى ءتۇرلى بولادى. شۇعىل ريەۆاكسيناسيا بار، ول جالپى ۇجىمدىق يممۋنيتەت قالىپتاستىرۋعا دەيىن سالىنادى. ال جوسپارلى ريەۆاكسيناسيا جىلىنا ءبىر رەت جاسالادى. ءبىز ءقازىر ساراپتاپ جاتىرمىز، سەبەبى قازاقستان ۆاكسيناسيانى سالىستىرمالى تۇردە جايىراق، اقپان ايىنان باستادى. كوپشىلىك ماۋسىم-شىلدە ايلارىندا ەكپە الدى. ءبىزدىڭ انتيدەنەلەر ءالى دە جاڭا، دەڭگەيى جوعارى. سوندىقتان ەكىنشى دوزانى العاننان كەيىن شامامەن 9 اي وتكەن سوڭ،  كۇنتىزبەگە قوساتىن شىعارمىز، – دەدى مينيستر.

وسىلايشا مينيستر مۇنى ارىپتەستەرىمەن تالقىلاپ جاتقانىن، ددسۇ-مەن كەڭەسەتىنىن اتاپ ءوتتى. ريەۆاكسيناسيا تۋرالى ءبىرىنشى كەزەكتە وتكەن جىلى ۆاكسيناسيالانعان ەلدەر – اقش، يزرايل، رەسەي ايتقان.

– ولاردىڭ العاشقى ۆاكسينانى العانىنا 9 ايدان استى. قازاقستاندا ريەۆاكسيناسيا قازان ايىنا وزەكتى بولادى، سەبەبى ءبىزدىڭ ازاماتتار العاشقى ەكپەنى اقپان ايىنىڭ باسىندا العان، – دەپ ايتتى دەنساۋلىق ساقتاۋ ءمينيسترى.