ءبىلىم جانە عىلىم ءمينيسترى اسحات ايماعامبەتوۆ جاڭا وقۋ جىلىن ءداستۇرلى فورماتتا ۇيىمداستىرۋدى  جوسپارلاپ وتىرعانىن مالىمدەدى. بۇل تۋرالى ول ۇكىمەتتىڭ كەڭەيتىلگەن وتىرىسىندا ايتتى.

– وقۋشىلاردى، سونىمەن قاتار كوللەدجدەر مەن جوعارى وقۋ ورىندارىنىڭ ستۋدەنتتەرىن قاتاڭ سانيتارلىق تالاپتاردى ساقتاي وتىرىپ، ءداستۇرلى فورماتتا وقىتىلادى. بالاباقشالاردا 20-25 بالادان اسپايتىن توپتارعا شتاتتىق رەجيمدە جۇمىس ىستەۋ ۇسىنىلادى، – دەدى مينيستر. 

سونداي-اق ءبىلىم بەرۋ ۇيىمدارىندا كۇندەلىكتى تەرمومەتريا، جەلدەتۋ، كۆارستەۋ، دەزينفەكسيا شارالارى وتكىزىلەدى.

– 1-قىركۇيەكتە بولاتىن ءبىلىم كۇنى سالتاناتتى ءىس-شارا  ءداستۇرلى فورماتتا، مەكتەپ اۋماعىندا 1-سىنىپ وقۋشىلارى ءۇشىن ۇيىمداستىرىلادى. ولارعا سالتاناتتى تۇردە العاشقى وقۋلىق "الىپپە" تابىستالادى. ال، 2 مەن 11 سىنىپ وقۋشىلارى تىكەلەي بەكىتىلگەن كابينەتتەرگە بارىپ، تاقىرىپتىق سىنىپ ساعاتتارىنا قاتىسادى.

جاڭا وقۋ جىلىندا مەكتەپ فورماسى بويىنشا تالاپتار نەگىزىنەن ساقتالادى. ءبىراق پاندەميا جاعدايلارىنا بايلانىستى مەكتەپكە كلاسسيكالىق ستيلدەگى ىڭعايلى كيىممەن كەلۋگە رۇقسات ەتىلەدى، – دەپ ايتتى ءبىلىم ءمينيسترى. 

سونداي-اق بۇقارالىق ءىس-شارالارعا تىيىم سالىنادى. ستۋدەنتتەر، پەداگوگتەر مەن باسقا دا قىزمەتكەرلەر عيماراتقا "Ashyq" جۇيەسى ارقىلى كىرگىزىلەدى.