پرەمەر-مينيستر اسقار مامين قازاقستاندا شەكتەۋ شارالارى مەن ماسكا تاعۋ رەجيمىن ساقتاۋ بويىنشا ۇكىمەت وتىرىسىندا تاپسىرما بەردى. 

ۇكىمەت باسشىسى ۆاكسيناسيا پاندەميادان شىعۋدىڭ ماڭىزدى جولى بولىپ قالا بەرەتىنىن اتاپ ءوتتى.

– قازىرگى ۋاقىتتا ءبىرىنشى كومپونەنتپەن 5،9 ميلليوننان اسا ادام ەگىلدى، ال ەكىنشى كومپونەنتپەن 4،5 ميلليونعا جۋىق ادام ەگىلدى. ءبىراق بۇل جەتكىلىكسىز. باتىس قازاقستان، ماڭعىستاۋ جانە اتىراۋ وبلىستارىنىڭ اكىمى ەگۋ جوسپارىنىڭ بيىل تامىزىندا ورىندالۋىن قامتاماسىز ەتۋى ءتيىس، – دەدى مامين.

پرەمەر-مينيستر وسى جىلعى 25 تامىزعا دەيىن مەديسينالىق قارسى كورسەتىلىمدەرى بار ادامداردان باسقا، پەداگوگتار مەن تەحپەرسونالدى ۆاكسينالاۋمەن 100% قامتاماسىز ەتۋدى، وسى جىلعى 20 تامىزعا دەيىن مەكتەپتەردى سانيتاريالىق تالاپتارعا سايكەس (كۆارستەۋ، دەزينفەكسيا، ماسكا رەجيمى، كۇندەلىكتى تەرمومەتريا جانە ت.ب.) قابىلداۋدى اياقتاۋدى تاپسىردى.  

– حالىقتىڭ شەكتەۋ شارالارىن، اسىرەسە بەتپەردە رەجيمىن ساقتاۋىن قامتاماسىز ەتۋ قاجەت. ول ءۇشىن مونيتورينگتىك توپتاردىڭ جۇمىسىن جانداندىرىپ، ءتارتىپ بۇزۋشىلار جاۋاپكەرشىلىككە تارتىلۋى ءتيىس، – دەدى اسقار مامين.

ول ءوڭىر باسشىلارىنا ۆاكسينالاۋ قارقىنىن كۇشەيتۋدى تاپسىردى.

سونداي-اق "Ashyq" جۇيەسىنە قاتىساتىن كاسىپكەرلىك سۋبەكتىلەرىنىڭ سانى ارتىپ كەلە جاتقانىن دا اتاپ ءوتتى.

– ولاردىڭ سانى 5 ەسەگە، 21 مىڭنان 101 مىڭعا دەيىن كوبەيدى. بۇل بيزنەستىڭ جۇمىسىن جالعاستىرۋعا مۇمكىندىك بەرەدى. سوندىقتان "Ashyq" قوسىمشاسىن قولدانۋ اياسىن ودان ءارى دە كەڭەيتۋ قاجەت، – دەدى اسقار مامين.