شىمكەنت قالاسىنىڭ اكىمى مۇرات ايتەنوۆتىڭ توراعالىعىمەن ينۆەستيسيالىق شتابتىڭ كەزەكتى وتىرىسى ءوتتى. وندا 8 جوبا تانىستىرىلىپ، وزەكتى ماسەلەلەرى تالقىلاندى.

«وڭتۇستىك» ارنايى ەكونوميكالىق ايماعىنان تاعى ءبىر اياق كيىم شىعاراتىن جاڭا كاسىپورىن اشىلماق. ول ءۇشىن وندىرىستىك ايماقتان 1 گەكتار جەر بەرىلەتىن بولىپ شەشىلدى. قالا اكىمى جوبامەن تانىسىپ، ينفراقۇرىلىم مەن ەكونوميكالىق ايماقتىڭ جەڭىلدىكتەرىن ۇيىمداستىرۋ تۇرعىسىندا مەملەكەتتىك قولداۋ كورسەتىلەتىنىن ايتتى.

تاعى ءبىر جوبا - كەڭسەلىك جانە تيپوگرافيالىق قاعاز شىعارۋعا باعىتتالعان. قۇنى – 621 ملن تەڭگە بولاتىن كاسىپورىن ىسكە قوسىلعان كەزدە ءونىمىن ىشكى نارىققا جانە تمد ەلدەرىنە شىعارادى. مەكەمەگە «وڭتۇستىك» ارنايى ەكونوميكالىق ايماعىنان 1،96 گەكتار جەر بەرىلگەن. بۇگىندە بارلىق قاجەتتى قۇرال-جابدىقتار ساتىپ الىنعان. كاسىپكەر جەر جانە ينفراقۇرىلىممەن تولىق قامتاماسىز ەتۋ جونىندە كومەك سۇرادى. جوباعا قولداۋ كورسەتىلەتىن بولادى.

ودان وزگە، ماڭىزدى جوبانىڭ ءبىرى – وندىرىستىك اۋماق قۇرۋ تۋرالى بولدى. «ADS Industries» ج ش س ءتۇرلى كاسىپكە ارنالعان دۇڭگىرشەك سالۋدى جوسپارلاپ وتىر. كاسىپكەر وعان 1 گەكتار جەر سۇراپ وتىر. شاھار باسشىسى قالا ىشىنەن جەر تاۋىپ بەرىپ، بارلىق قولداۋدى كورسەتەتىن بولىپ شەشىم قابىلداندى.

ال، «JANNA ELTANOVA» ج ش س كيىم، اياق كيىم مەن شۇلىقتار شىعارماق. وعان «وڭتۇستىك» ارنايى ەكونوميكالىق ايماعىنان 0،7 گەكتار جەر بەرىلدى. بۇگىندە وندا جەر جۇمىستارى باستالعان، ترانسفورماتور قويىلعان. قالا اكىمى جەردى جالعا بەرۋ اقىسى، دايىن ينفراقۇرىلىم مەن ەكونوميكالىق ايماقتىڭ جەڭىلدىكتەرىن ۇيىمداستىرۋ تۇرعىسىندا مەملكەتتىك قولداۋ كورسەتىلەتىنىن جەتكىزدى.

«Asar House» تۇرعىن ءۇي كەشەنىن سالۋعا نيەتتى كاسىپكەر جەرىنىڭ نىسانالى ماقساتىن وزگەرتىپ بەرۋىن سۇرادى. مۇرات ايتەنوۆ كوپ قاباتتى تۇرعىن ءۇيدىڭ ەسكيزدىك جوباسى مەن ورنالاساتىن ورنى بويىنشا قالانىڭ باس ارحيتەكتورىمەن بىرگە قاراپ، ۇسىنىس ەنگىزۋدى تاپسىردى.

«شتابتەكس» كاسىپورنى ارالاس جانە ماقتا-ماتا شىعارۋدى قولعا الماق. جاڭا مەكەمە ارقىلى 100 ادامدى جۇمىسپەن قامتي الاتىنىن ايتقان ج ش س جەتەكشىسى جەر ءبولۋدى جانە دايىن ينفراقۇرىلىم ارقىلى اەا-تا جەڭىلدىكتەر قاراستىرىپ بەرۋدى سۇرادى. جوبا شتاب بارىسىندا قولداۋ تاۋىپ، «وڭتۇستىك» اەا-تان 1 گەكتار جەر بولىنەتىن بولىپ شەشىلدى.

تاعى ءبىر ينۆەستور توقىما ەمەس ماتەريالدار ءوندىرىسىن اشپاق. جوبانى ىسكە قوسۋ ءۇشىن مەملەكەتتىك قولداۋ رەتىندە «وڭتۇستىك» اەا-تان 0،8 گەكتار جەر بەرىلىپ، ينفراقۇرىلىممەن قامتاماسىز ەتىلەتىن بولدى.

قۇرىلىستا ماڭىزدى بولىپ تابىلاتىن گازوبلوك ءوندىرىسىن اشۋ تۋرالى جوبانى «اسىل وركەن قۇرىلىس» ج ش س ۇسىندى. تاۋلىگىنە 60 تەكشە گازوبلوك شىعاراتىن كاسىپورىندى ىسكە قوسۋ ءۇشىن 0،5 گەكتار جەر سۇراپ وتىر. قالا اكىمى «جۇلدىز» يندۋستريالدى ايماعىنان جەر قاراستىرۋ بويىنشا سالا باسشىسىنا ۇسىنىس بەرۋىن تاپسىردى.

جيىندى قورىتىندىلاعان شاھار باسشىسى شتابقا ۇسىنىلاتىن ءاربىر جوبانىڭ وزىندىك ەرەكشەلىگى مەن تيىمدىلىگىنە ءمان بەرۋدى جۇكتەدى. سالا جەتەكشىلەرىنە ينۆەستيسيا تارتۋ ماسەلەسىندەگى تۇيتكىلدەردى زەردەلەپ، حاتتامالىق نەگىزدە باقىلاۋعا الۋدى تاپسىردى.