شىمكەنت قالاسىنداعى بالالار اۋرۋحاناسىنا جەدەل جاردەم قىزمەتىمەن بەس جاسار بالا اۋىر حالدە جەتكىزىلگەن. دەنساۋلىعى سىر بەرگەن بالاقايدى دارىگەرلەر جانساقتاۋ بوىلىمنە شۇعىل جاتقىزىپ، تەكسەرۋ جۇمىستارىن جۇرگىزگەن.

ناۋقاس بالادان الىنعان سىناما ناتيجەسىندە كاۆاساكي تارىزدەس سيندروم انىقتالعان. ءقاۋىپتى ىندەت انىقتالعان بالاقايدىڭ جاعدايى العاشقى ءۇش كۇندە ناشارلاپ كەتكەن. تەك ءتورتىنشى تاۋلىك كۇنى عانا ناۋقاس بالانىڭ دەنساۋلىق جاعدايى تۇراقتالعان،- دەپ حابارلايدى دەنساۋلىق ساقتاۋ باسقارماسى.

ەمدەۋ شارالارىمەن قاتار ماماندار ينفەكسياعا شالدىققان بالانىڭ اعزاسىنداعى وزگەرىستەردى دەر كەزىندە انىقتاپ، ومىرىنە تونگەن ءقاۋىپتى الدىن العان.

اتا-اناسىنىڭ سوزىنشە، بالاسىندا اۋرۋدىڭ العاشقى بەلگىلەرى بايقالعاندا، جەكەمەنشىك كلينيكادا ەم العان. بالادا اۋرۋ بەلگىلەرى باسىلعان سوڭ، ۇيدەگى ۇلكەندەر سىرقاتىنا ءمان بەرمەپتى. الايدا اراعا ءبىر اپتا سالىپ، بالانىڭ جاعدايى كۇرت ناشارلاپ، جانساقتاۋ بولىمىنەن ءبىر اق شىقتى دەيدى.

مەديسينا ماماندارى بالانىڭ دەنە قىزۋى 38،5-تەن جوعارى بولسا، ءىش اۋىرۋى، قۇسۋ، جۇرەك اينۋى، دەنەدەگى بورتپە داق، جوتەل پايدا بولسا، مىندەتتى تۇردە دارىگەر شاقىرتۋ قاجەتتىگىن ەسكەرتەدى. ويتكەنى، بۇلار – كاۆاساكي تارىزدەس مۋلتيجۇيەلى قابىنۋ سيندرومىنىڭ بەلگىلەرى. دەر كەزىندە دارىگەرگە كورىنبەسە، سوڭى قايعىلى جاعدايعا الىپ كەلۋى دە ىقتيمال. ويتكەنى، اۋرۋ جۇرەك پەن وكپە، اسقازان، ىشەك جولى نەمەسە جۇيكە جۇيەسى سەكىلدى اعزانىڭ بىرنەشە جۇيەسىن بىردەن زاقىمدايدى.

اتالمىش اۋرۋدىڭ الدىن الۋ ءۇشىن ەرەسەكتەر بالانى كوروناۆيرۋستان ساقتاۋعا كۇش سالۋى كەرەك. ونىڭ بىردەن ءبىر جولى – ۆاكسينا سالدىرۋ. سوندىقتان دارىگەرلەر ءار ادام ءوز وتباسىن قورعاۋ ماقساتىندا ەكپە سالدىرۋىنىڭ ماڭىزى زور ەكەنىن تاعى دا اتاپ ءوتتى.