الماتى وبلىسىنا قاراستى كەمەرتوعان اۋىلىنىڭ اينالاسى ورتەنىپ جاتىر. اۋىل تۇرعىندارىنىڭ ايتۋىنشا، تۇتىنگە تۇنشىعىپ وتىرعانىندارىنا بۇگىن ءۇشىنشى كۇن. "قامشى" رەداكسياسىنا حابارلاسىپ، كومەك سۇراعان تۇرعىندار اكىمدىك تاراپىنان قاجەتتى كومەك كورسەتىلمەي جاتقانىن جەتكىزدى.

كەمەرتوعاندىقتار ءقازىر جەلدىڭ باعىتىن اڭدىپ وتىر. ويتكەنى جەل قايدا سوقسا، ءورت سول باعىتقا قاراي جىلجىپ، اۋىلعا جاقىنداپ كەلەدى. اكىمدىك تاراپىنان ءورتتى سوندىرۋگە ۋادە بەرگەن. الايدا قويۋ ءتۇتىننىڭ ىشىنە تەحنيكا كىرە الماعان. 

ال تراكتورشىلار بولسا سيىر فەرماسىنا قارايتىن اۋماققا مالدىڭ قيى توگىلگەندىكتەن، تراكتور باتىپ، تەحنيكامىز ورتەنىپ كەتەدى دەپ ساقتانىپ وتىر.

اۋىل تۇرعىندارىنىڭ سوزىنشە، ءورت سوندىرۋشىلەر بۇگىن ءۇشىنشى كۇن دەگەندە قاراسىن كورسەتكەن. ءبىراق ءورت بولىپ جاتقان ايماققا سۋسىز كەلگەن. كەيىننەن ەكىنشى كولىك كەلىپ، ءورتتى سوندىرە باستاعانىمەن كۇشى جەتپەگەن. 3 كۇننەن بەرى جانىپ جاتقان ءورت اۋماعى شامامەن 5-6 گەكتار اۋماقتى قۇرايدى.

– اۋىلدا دەمىكپە اۋرۋىمەن اۋىراتىندار كوپ، تەرەزەمىزدى جاپساق تا، ءتۇتىن ۇيگە كىرىپ كەتىپ جاتىر، – دەيدى كەمەرتوعان تۇرعىنى ايسۇلۋ سەيداحمەت.

"اۋىل ىشىندە سيىر فەرماسى بار. بىلتىر دا تەزەگىن فەرما سىرتىنا توگىپ، ويناپ جۇرگەن بالا باتىپ كەتكەن بولاتىن. ەندى سول تەزەك تۇتانىپ، بىرنەشە كۇننەن بەرى اۋىلدى ءتۇتىن باستى" دەيدى تۇرعىندار.

قاراساي اۋدانى اكىمدىگىنىڭ باسپا ءسوز حاتشىسى باقداۋلەت تاليپوۆ الاپات ورتكە قاتىستى پىكىر ءبىلدىردى.

– كەمەرتوگان اۋىلىنىڭ سولتۇستىك جاعىندا ورنالاسقان القاپتا ەگىستىككە توگىلگەن قي (ناۆوز) ورتەنگەن بولاتىن. شامامەن 7 گەكتاردى العان ءورتتىڭ الدىن الۋعا 3 سۋ تاسىمالدايتىن ارنايى كولىك پەن 1 تراكتور جۇمىلدىرىلدى. ءورت اۋىزدىقتالعانىمەن، ءتۇتىن توقتاماي تۇر. قازىرگى كەزدە، ونى تولىعىمەن وشىرۋگە بارلىق ءىس-شارالار جالعاسۋدا. ادام ومىرىنە ەشقانداي ءقاۋىپ ءتونىپ تۇرعان جوق، – دەيدى باسپا ءسوز حاتشىسى.