شىمكەنت قالاسىنىڭ بارلىق اۋدان اۋماقتارىندا قىسقى جىلىتۋ ماۋسىمىندا قاۋىپسىزدىك شارالارىن ساقتاۋ بويىنشا اقپاراتتىق-تۇسىندىرمە جۇمىستارى جالعاسىن تابۋدا.
جىلۋ ماۋسىمى باستالىسىمەن-اق ءورت پەن گازدان ۋلانۋ فاكتىلەرى كوبەيەدى. كوبىنە وعان پاتەر يەلەرىنىڭ قاراپايىم قاۋىپسىزدىك ەرەجەلەرىن ساقتاماۋى سەبەپ. جاۋاپتى سالا ماماندارىنىڭ سوزىنشە، قايعىلى وقيعالاردىڭ كوپشىلىگى تۇرمىسى تومەن وتباسىلار تۇراتىن ۇيلەردە تىركەلەدى.
قايعىلى جاعدايدىڭ الدىن الۋ ءۇشىن توتەنشە جاعدايلار دەپارتامەنتى تاراپىنان 1 102 مەملەكەتتىك اتاۋلى الەۋمەتتىك كومەك الۋشى ازاماتتاردىڭ ۇيلەرىنە گاز دابىل قاققىش قۇرىلعىسى ورناتىلعان. وتكەن جىلى تۇرمىس جاعدايى تومەن 10 وتباسىعا پيلوتتىق جوبادا گاز دابىل قاققىش ورناتىلعان بولاتىن. ناتيجەسىدە ەكى رەت دابىل بەرىپ، 5 ادام ۋلى گازدان ۋلانۋدان امان قالدى. وسى جۇمىستار دەمەۋشىلەر ەسەبىنەن جاسالىنعان.
جالپى شىمكەنت قالاسىندا اتاۋلى الەۋمەتتىك كومەك الۋشى 34 862 وتباسى بار. وسىنى ەسكەرە وتىرىپ بيىلعى جىلى 5 مىڭ دانا دابىل قاققىش قۇرىلعىسىن ورناتۋ جوسپارلانۋدا. بۇل قۇرالدىڭ ەرەكشەلىگى قاتتى جانە سۇيىق وتىننان ۋلى گاز ءبولىنىپ بولمەگە تاراسا دەر كەزىندە دابىل قاعادى.
سونىمەن بىرگە ماماندار مۇرجانى ۇدايى تەكسەرىپ، گاز جابدىقتارى ورناتىلعان بولمەگە اۋانىڭ كىرۋىن قامتاماسىز ەتۋ قاجەتتىگىن ەسكەرتەدى. وسى قاراپايىم ەرەجەلەردى ساقتاي وتىرىپ، ءوزىڭىزدىڭ جانە جاقىندارىڭىزدىڭ ءومىرىن ساقتايسىز!
پىكىر قالدىرۋ