«5-10-20 شاڭىراق» باعىتىنىڭ تالاپتارىنا سايكەس، تۇرعىن ءۇي كەزەگىندە تىركەلگەن تولەمگە قابىلەتتى بارلىق ساناتتاعى ازاماتتاردىڭ ءوتىنىم جىبەرۋ مۇمكىندىگى قاراستىرىلعان. اتالعان باعىت «نۇرلى جەر» مەملەكەتتىك باعدارلاماسى اياسىندا نەسيەلىك باعىتتا جەڭىلدەتىلگەن پايىزدىق كورسەتكىشكە يە.

مۇندا ازاماتتارعا قويىلاتىن باستى تالاپتار - وتباسىنىڭ جيىنتىق تابىسى ەڭ تومەنگى كۇنكورىس دەڭگەيىنىڭ 3،7 ەسەلەنگەن شاماسىنان (2021 جىلعا - 126 917 تەڭگە) اسپاۋى ءتيىس.

ازاماتتارعا جاڭا تۇرعىن ءۇي ساتىپ الۋعا بەرىلەتىن قاراجات كولەمى – 15 ملن تەڭگە. بۇل سوما جىلدىق مولشەرلەمەسى 5 پايىز، العاشقى جارنا 10 پايىزبەن 20 جىلعا نەسيەلىك نەگىزدە راسىمدەلەدى. اتالعان باعىت بويىنشا وتىنىمدەردى قابىلداۋ «وتباسى بانكى» ينتەرنەت رەسۋرستارى ارقىلى جۇرگىزىلەدى.

ايتا كەتۋ كەرەك، بيىل شىمكەنت قالاسى بويىنشا «نۇرلى جەر» مەملەكەتتىك باعدارلاماسى اياسىندا «شاڭىراق» باعىتىمەن تۇرعىن ءۇي كەزەگىندە تۇرعان 1728 ازامات نەسيەلىك باسپاناعا قول جەتكىزەدى.