Anadolu ajans اقپارات اگەنتتىگى تالىپتەر كابۋلعا جاقىن ماڭداعى گازني قالاسىن باسىپ الىپ، تۇرمەدەگى جۇزدەگەن تۇتقىندى بوستاندىققا جىبەرگەنىن حابارلادى.

اۋعان بيلىگىنىڭ مالىمدەۋىنشە، تالىپتەر قالاداعى باستى مەكەمەلەر – گۋبەرناتوردىڭ كەڭسەسى، پوليسيا ۋچاسكەسى مەن تۇرمەنى ءوز باقىلاۋىنا الىپ، كوپتەگەن قارۋ جاراقتار مەن وق-دارىلەردى تارتىپ العان.

ۇيىم "ءشىبىرعان" تۇرمەسىندەگى بارلىق تۇتقىندار بوساتىلعانىن حابارلادى. الەۋمەتتىك جەلىلەردە جاريالانعان ۆيدەودا جۇزدەگەن تۇتقىننىڭ تۇرمەدەن بوساتىلعانىن كورۋگە بولادى.

– "بۇل تەك باستاماسى عانا جانە سىزدەر باسقا پروۆينسيالاردىڭ  ءبىزدىڭ قولىمىزعا قالاي وتەتىنىن جاقىندا كورەسىزدەر، – دەدى الەۋمەتتىك جەلىدە تاليبان وكىلدەرى.

ەلدىڭ قورعانىس مينيسترلىگى قارۋلى قاقتىعىس كەزىندە كۇنىنە 200-دەن كوپ  سودىردىڭ كوزى جويىلىپ جاتقانىن ايتادى. ءقازىر سوعىس قيمىلدارى بىرنەشە پروۆينسيادا قاتار ءجۇرىپ جاتىر.

سونداي-اق "ءال-جازيرا" ارناسىنىڭ حابارلاۋىنشا، اۋعانستان ۇكىمەتى تالىپتەرگە زورلىق-زومبىلىقتى توقتاتىپ، ەل باسقارۋ ىسىنە قاتىسۋدى ۇسىنعان. اۋعانستاننىڭ باسقا ايماقتارىندا دا قاقتىعىستار جالعاسىپ، تالىپتەردىڭ باسقا پروۆينسيالاردى جاۋلاپ الۋى جىلدام وربۋدە.

ايتا كەتەيىك، اۋعانستانداعى جاعداي اقش اسكەرىن اكەتە باستاعان كەزدەن ۋشىقتى. كەيبىر دەرەك كوزدەرى بويىنشا تالىپتەر ەل اۋماعىنىڭ 65 پايىزىن جاۋلاپ العان.