ەل ىشىندە ەكىنشى تۇرعانىڭدى قايتەيىن، ەۋروپادا ەڭ بولماعاندا ەكى ويىندا جەڭۋگە جارامادىڭ. العاشقى ويىندا «ءاريستى» اۋپىرىمدەپ وتكەنىمەن «استانا» فينليانديانىڭ «كۋپس» كومانداسىنان اسا المادى. «ءاريستى» جەڭۋ ابىروي ەمەس، ويتكەنى ول – چەمپيوناتى ءالى باستالماعان گرەكيا ەلىنىڭ كومانداسى. ال تونۋستا جۇرگەن كوماندامەن كەزدەسكەنى سول ەكەن، بىردەن توپالاڭ استى. ءبىراق ايتپاعىمىز بۇل ەمەس. ويىن جاعى بولەك تاقىرىپ. ەلوردالىق كلۋبتا بۇدان باسقا دا سوراقى نارسەلەر بار. سونىڭ ءبىرى – ءتىل ماسەلەسى جانە كلۋبتىڭ باسپا ءسوز قىزمەتىندەگى كەمشىلىكتەر.

قازاق فۋتولىندا كلۋبتىق دەڭگەيدە سوڭعى جىلدارى ەۋروپا ارەنالارىندا قۋانتقان ءبىر كومانداسا بولسا، ول – ارينە، «استانا». ەلىمىزدىڭ التى دۇركىن چەمپيونى. چەمپيوندار ليگاسىنىڭ توپتىق كەزەڭىندە ونەر كورسەتتى. بىرنەشە رەت ەۋروپا ليگاسىندا 48 مىقتىنىڭ قاتارىنا قوسىلدى. الايدا ەلىمىزدىڭ فلاگمانى سانالاتىن كوماندانىڭ مەملەكەتتىك تىلگە قىرىن قارايتىنى قىنجىلتادى.

قارسىلاستىڭ جايىن ءبىر قاراپ جىبەرەيىك دەپ ويىن الدىندا «كۋپس»-تىڭ رەسمي سايتىن اقتارعام. ءبىرىنشى بەتتەن-اق فيندارمەن بەتپە-بەت كەزدەسكەندەي بولدىم. سۋومي تىلىندە سايرايتىن سايت ەكەن. ءوز تىلىنە دەگەن قۇرمەتى شىعار، اعىلشىنشا نۇسقاسى مۇلدەم جوق. كەرەك ادام «اۋدارماشى» ارقىلى ءتۇسىنىپ السىن دەگەنى سياقتى. ال بىزدىكى شە؟ بىردەن ورىس تىلدەگى جاڭالىقتارعا كوزىڭ تۇسەدى. سوسىن قازاق تىلىندەگى نۇسقانى تاڭداۋعا تۋرا كەلەدى. ءبىراق مۇنداعى جاڭالىقتاردىڭ دا كەش جاڭاراتىنىن بايقايسىڭ. ونىڭ ۇستىنە، ورىس تىلىندەگى جاڭالىقتى تىكەلەي اۋدارا سالعانىن اڭعارۋ قيىن ەمەس. كالكا سوزدەر وتە كوپ.

مىسالى، «كۋپس»-پەن بولعان ويىننىڭ الدىندا اندرەي تيحنونوۆتىڭ پىكىرىن ءبىلۋ ءۇشىن كلۋبتىڭ رەسمي سايتىنا كىرگەنبىز. باس باپكەر سۇحباتىنىڭ تاقىرىبى مىناداي: اندرەي تيحونوۆ: «جەڭىس ءۇشىن وينايتىن بولامىز». ءدال وسى جەردە «بولامىز» دەگەن ءسوزدىڭ ءوزى ورىسشادان تىكەلەي اۋدارىلعانى ءبىلىنىپ تۇر. فيلولوگ ەمەسپىن، ءبىراق جاي عانا «جەڭىس ءۇشىن وينايمىز» دەسە، الدەقايدا دۇرىس بولاتىن سياقتى. سۇحباتتىڭ ىشكى مازمۇنى دا جەتىسىپ تۇرعان جوق. ءماتىندى Google اۋدارماشىنىڭ كومەگىمەن اۋدارا سالعانى ايتپاسا دا تۇسىنىكتى. سايتتا مۇنداي تۇسىنىكسىز سوزدەر وتە كوپ. جوعارىدا ايتقانداي ءماتىن تۇرماق، تاقىرىپتىڭ ءوزى قاتە-قاتە.

ودان ارىگە كەتسەك. ءماتىنى مىنانداي:  «ناتيجەسىز ادەمى فۋتبول ويناۋعا بولادى. مىسالى، جانكۇيەرلەردىڭ ءوتىنىشىن ورىنداپ، كىل جاستاردى شىعارىپ، ءۇش ويىندا ءنول ۇپاي جينايتىن بولساق، ولار نە ايتادى؟ ارينە، ناشار باپكەر».

بۇدان نە ءتۇسىندىڭىز. مەن ەشنارسە ۇقپادىم. ايتا بەرسەك، مۇنداي قاتەلەر وتە كوپ.

«استاناننىڭ» الەۋمەتتىك جەلىدەگى پاراقشالارى دا وڭىپ تۇرعان جوق. قازاقستان كۋبوگىنىڭ ءۇشىنشى تۋرىندا «استانا» ءوز الاڭىندا ورالدىڭ «اقجايىق» كومانداسىن جەڭدى. ماچتاعى جەڭىس گولىن ابات ايىمبەتوۆ سوقتى.

سونداعى كلۋبتىڭ رەسمي پاراقشاسىندا مىنانداي قۇتتىقتاۋ جازىلعان: «ءوز الاڭىمىزدا «اقجايىقتى» مينيمالدى ەسەپپەن تىزە بۇكتىردىك – 1:0.

جەڭىستىڭ گولدىڭ اۆتورى ابات ايىمبەتوۆ!» دۇرىسى: جەڭىس گولىن سوققان ابات ايىمبەتوۆ.

جارايدى، ونى قويشى، سول Google اۋدارمالاردىڭ ءوزى ورىسشاسىمەن سالىستىرعاندا از. مىسالى، 1 تامىز بەن 13 تامىز ارالىعىندا كلۋبتىڭ رەسمي سايتىنا شىققان اقپاراتتاردى ساناپ شىقتىق. ورىسشادا – 22 اقپارات، قازاقشادا 15 ماتەريال عانا. راسىمەن دە، مەملەكەتتىك تىلدە جازىلعان اقپاراتتار جوقتىڭ قاسى. ال جانكۇيەر رەتىندە ءبىز ءۇشىن مۇنداي جاڭالىقتار وتە ماڭىزدى.

ەلوردامىز «قىزىل» ايماقتا  بولعاندىقتان ماچقا جانكۇيەرلەردىڭ كىرۋىنە رۇقسات جوق. تەك ب ا ق وكىلدەرى عانا كىرە الادى. الايدا باسپا ءسوز كونفەرەنسيالارىنداعى «ءتورتىنشى بيلىك» وكىلدەرىنىڭ دە سانى جوقتىڭ قاسى. «كۋپس»-پەن بولعان ويىننىڭ الدىنداعى كونفەرەنسياعا بار بولعانى 5-اق ءتىلشى وتىردى. بۇل كلۋب باسپا ءسوز قىزمەتىنىڭ جۇمىس كورسەتكىشى بولسا كەرەك.

باسپا ءسوز قىزمەتى دەمەكشى، «كۋپس»-پەن بولعان ويىننىڭ الدىنداعى باسپا ءسوز كونفەرەنسياسىندا 5 مينۋت بويى ميكروفوندى قوسا الماي، ارتىنشا «دوبرو پوجالوۆات نا پرەسس-كونفەرەنسيۋ فۋتبولنوگو كلۋبا «كايرات» دەپ، «قارتوپتى جاردى». مۇنى ەلەۋسىز قالدىرا سالۋعا بولۋشى ەدى، ءبىراق «بارسەلونانىڭ» باسپا ءسوز قىزمەتكەرى ءوز كومانداسىن «رەالمەن» شاتاستىرىپ العانمەن بىردەي جاعداي بولعاندىقتان، قاراپ تۇرا المادىق. ونىڭ ۇستىنە، زيانى ۇزاق جىلدان بەرى «استانانىڭ» ىستىعىنا كۇيىپ، سۋىعىنا توڭىپ كەلە جاتقان وپەراتور پاۆەل لاپتيەۆكە ءتيىپ جاتىر ەكەن.

         سويتسەك، كلۋبقا جاڭادان كەلگەن باسپا ءسوز حاتشى بۇعان دەيىن الماتىنىڭ «قايراتى» مەن شىمكەنتتىڭ «ورداباسى» كلۋبتارىندا قىزمەت اتقارعان مامان ەكەن. فۋتبولدا پرينسيپ دەگەن بولاتىن ەدى عوي. نەگىزگى قارسىلاستارىندا قىزمەت اتقارعان ازاماتقا قالاي باسپا ءسوز حاتشىلىعىن سەنىپ تاپسىرعان؟ مۇنى دا ۇقپادىق. بۇعان دەيىن دە «قايراتتىڭ» ارداگەر ويىنشىسى سانالاتىن ميحايل گۋرمان كلۋب تىزگىنىن ۇستاعاندا وسىنداي اڭگىمەلەر شىققان بولاتىن. ساباق الماپپىز... دەگەنمەن «استانانىڭ» باسپا ءسوز قىزمەتىنە جاۋاپ بەرەتىن مۇلدەم باسقا ادام دەسەدى. ءتىپتى، بۇرىن-سوڭدى ەشبىر باق-تا قىزمەت ەتپەگەن ايەل ادام باسقارادى دەپ تە ەستىدىك. بالكىم، كلۋبتىڭ باق-پەن بايلانىستى جوعالتىپ العانى دا سوعان بايلانىستى شىعار. ايتپەسە، بۇرىن دميتريي نەستەرەنكو بولعاندا باسپاسوزبەن بايلانىس ماسەلەسىندە مۇنداي پروبلەمالاردى ەستىمەيتىنبىز. كلۋبتىڭ قازاقشاسى دا جاقسى ەدى.

ودان بولەك، كلۋبتىڭ رەسمي ترانسفەرلەرىنىڭ ءوزى سايتتا جاريالانباعان. ۋەفا كونفەرەنسيا ليگاسىنىڭ ىرىكتەۋ كەزەڭىنىڭ الدىندا كومانداعا ەكى جاڭا ويىنشى قوسىلدى. ولار – چەرنوگوريالىق شابۋىلشى فاتوس بەچيراي مەن پورتۋگاليالىق پەدرو ەۋجەنيو. ءبىراق ول تۋرالى نە ورىس، نە قازاق تىلىندە اقپارات جوق. تەك الەۋمەتتىك جەلىدەگى حابارلاندىرۋمەن شەكتەلگەن. ەسەسىنە، كوماندادان كەتكەن رومان مۇرتازايەۆ تۋرالى مالىمەت بار. 

         قىسقاسى، ەلىمىزدىڭ اتىن ەۋروپا ارەنالارىندا تانىتىپ جۇرگەن ەلوردانىڭ باس كومانداسىنىڭ مەملەكەتتىك تىلدە دە سويلەپ، اقپارات تاراتقانىن قالايمىز. كلۋبتىڭ باس باپكەرى، ديرەكتورى، ويىنشىلارى ەشقايسىسى قازاق ءتىلىن بىلمەيدى، بىلسە دە سويلەمەيدى. كەرەك تە قىلمايتىن شىعار. ايتپەسە، تىم بولماسا، سايتتىڭ جاعدايىن جاساپ قويار ەدى عوي. فۋتبولشىلاردان قازاقشا سويلەيتىن كاپيتان ابزال بەيسەبەكوۆ بار. ءبىراق ونىڭ سۇحبات بەرۋى وتە قيىن.

         «استانا» جەكە كلۋب ەمەس. مەملەكەت قاراجاتىمەن ءومىر ءسۇرىپ وتىر. سوندىقتان وسىنداي كوماندانىڭ مەملەكەتتىك تىلگە قىرىن قاراۋى اقىلعا سىيىمسىز. ەندەشە، كلۋب باسشىلىعى الداعى ۋاقىتتا ءبىز ايتقان سىن-ەسكەرتپەلەردەن قورىتىندى شىعارادى دەپ ۇمىتتەنەمىز. 

 قۋانىش قاپپاس، سپورت ءجۋرناليسى