بەلگىلى كاسىپكەر بولات ءابىلوۆ مەدياكاسىپكەر ارمانجان بايتاسوۆقا بەرگەن سۇحباتتار سەرياسى بارىسىندا "بۋتيا كاپيتال" حولدينگىنە اقشا سالىپ، قاراجاتىن قايتارا الماي قالعان جاعدايلار تۋرالى سۇراققا جاۋاپ بەردى.

– جاپپاي جەكەشەلەندىرۋ 1993 جىلى باستالدى. ءبىزدىڭ ۇكىمەت جەكەشەلەندىرۋدى دۇرىس جۇرگىزبەدى. قولىڭدا ءىرى كاسىپورىننىڭ 10 پايىز اكسياسى بولۋى مۇمكىن، ءبىراق ونىمەن ەشتەڭە جاساي المايسىڭ. ال رەسەيدە قالاي ەدى... ول جاقتا (اكسيانى - رەد) اقشاعا، اراققا اۋىستىرىپ جاتتى. ادام قولىندا 1 مىڭ رۋبل بولۋى مۇمكىن. ونىمەن نە ىستەگىسى كەلسە دە ءوزى بىلەدى. ال بىزدەگى ادامداردا ءبىر ءتىلىم قاعاز بەن انا جاقتا بىرەۋ سەن ءۇشىن اقشا جاسايدى دەگەن سەنىم عانا بولدى. ءيا، ءبىز اقشا تابۋعا دايىن ەدىك. ءبىراق ەشتەڭە جوق بولسا، ءبارى قيراپ جاتسا، نە ىستەيمىز. ەسىمدە ءبىر قالادا مەتالل زاۋىتتىڭ 10 پايىز اكسياسىن ساتىپ الدىق. اتى دارداي، كەلسەك زاۋىت ەسكى، قاپ-قاراڭعى، قۇرال-جابدىعى ستالين زامانىنان بەرى جاڭارماعان. سول كەزدە بالالارعا ارنالعان "بالدىرعان" ۆەلوسيپەدىن شىعارىپ جاتىر ەكەن. ونىسى زىلدەي، بالا تۇرماق، ەرەسەك ادام كوتەرە المايدى. تاعى ءبىر فابريكانىڭ 10 پايىز اكسياسىن ساتىپ العانىمىز بار. كەڭەس وداعى كەزىندە ول جەردە 2 مىڭ ادام ىستەگەن. بارساق، شاعىن عانا بولمە. بارلىعى جابىلعان. جارىققا، جىلۋعا تولەي الماي وتىر. ءبىز مۇنداي كاسىپورىندى نە ىستەيمىز... سول كەزدە 164 قور بولدى. ءبىراق مەن مورالدىڭ جاۋاپكەرشىلىكتى سەزىندىم. سوندىقتان جۇرت الدىنا شىعىپ، بىزگە سەنۋىن سۇرادىم. "بۋتيا كاپيتال" قازاقستانداعى ەڭ ۇلكەن حولدينگ بولدى. كۋپونداردىڭ ۇشتەن ءبىرى بىزگە تيەسىلى ەدى. ءبىراق ءبىز وعان ەشتەڭە ىستەي المادىق. كەرىسىنشە ۇلكەن شىعىنعا باتتىق. مەن ءوز قالتامنان ونداعان ميلليون دوللار تولەدىم. بىزدە 2 جارىم ميلليون اكسيونەر بولدى. 500 مىڭى قايتا تىركەۋگە كەلدى. ءبىز ولارعا قاندايدا ءبىر قاراجات تولەي الدىق. سوندىقتان بۇل جەردە مەنىڭ ارىم تازا. بيزنەسمەن كوزىمەن قاراساق، تابىس تاپپاساق، كەرىسىنشە شىعىنعا باتساق، وندا نەگە تولەۋگە ءتيىسپىز. ءبىراق ءبىز اقشانى قايتاردىق. سول كەزدە ەلدە بىزدەن باسقا بىردە-بىر قور اكسيونەرلەرىنىڭ اقشاسىن قايتارعان جوق، – دەدى بولات ءابىلوۆ.