مەملەكەت باسشىسىنىڭ بۇقارالىق جانە بالالار سپورتىن دامىتۋ بويىنشا بەرگەن تاپسىرماسىنا سايكەس، شىمكەنتتە سپورتتى قولجەتىمدى ەتۋ ماقساتىندا كوپتەپ اشىق سپورت الاڭشالارى مەن بالالار ويىن الاڭدارى سالىنىپ جاتىر.

ەلىمىزدىڭ ءۇشىنشى مەگاپوليسىندە قولعا الىنعان «حالىق قاتىساتىن بيۋدجەت» جوباسىنا سايكەس بيىل ەڭبەكشى اۋدانىنا قاراستى 18 شاعىناۋدانداعى №6،7 ۇيلەردىڭ اۋلالارىنا بۇقارالىق سپورتپەن شۇعىلدانۋعا ارنالعان جاتتىعۋ الاڭشاسى مەن بالالار ويىن الاڭى ورناتىلاتىن بولدى. «نۋرسترويترانسسەرۆيس» ج ش س مەردىگەر مەكەمەسى تاراپىنان ەسكيزدىك جوبا دايىندالىپ، ماقۇلداندى.

«حالىق قاتىساتىن بيۋدجەت» جوباسىنا قاتىسىپ، جاڭالانىپ جاتقان اۋلالار سوڭعى رەت 2013 جىلى اباتتاندىرىلعان. اۋلالارداعى ەلەمەنتتەردىڭ باسىم بولىگىنىڭ توزىعى جەتكەن، تەمىردەن جاسالىنعان بۇيىمدار.

قازىرگى تاڭدا اۋلالاردى قايتا جاڭارتۋ بارىسىندا زاماناۋي ويىن ەلمەنتتەرى ورناتىلىپ، بالالاردىڭ قاۋىپسىزدىگى ءۇشىن ويىن الاڭشالارىنىڭ ەدەندەرىنە رەزەڭكە جابىن توسەلەدى. 3 D ويىن كەشەنى، اتكەنشەكتەر، تەربەلمەلى تەڭگەرگىش، قۇمسالعىش، تەربەلمەلى موتوسيكل، تەربەلمەلى جىلقى ويىن ەلەمەنتتەرى ورناتىلادى.

ودان بولەك جەڭىل اتلەتيكامەن اينالىساتىن «Street workout»، ترەناجەر الاڭشاسى ورناتىلادى. قۇرىلىسقا قولداناتىن زاتتاردىڭ بارلىعى تەك وتاندىق ءونىم بولادى دەيدى مەردىگەرلەر. ءتىپتى ويىن الاڭشاسىنا توسەلەتىن رەزەڭكە توسەنىشتىڭ ءوزى شىمكەنتتە جاسالادى ەكەن.