جاساندىسەرىكتەن تۇسىرىلگەن سۋرەتتەر كابۋلدىڭ نەگىزگى اۋەجايىنداعى بەيبەرەكەت كورىنىستەردى كورسەتتى. تاليبان كۇشتەرى اۋعانستاندى باقىلاۋعا العاننان كەيىن مىڭداعان ءۇمىتسىز اۋعاندار شەتەلگە قاشۋعا تىرىسىپ جاتىر.

فوتوسۋرەتتەردە ازاماتتىق ۇشاقتاردى قورشاپ تۇرعان ادامداردىڭ قالىڭ توبى كورىنەدى. كابۋلدە كەيبىر رەيستەر توقتاتىلعان.

بۇعان دەيىن الەۋمەتتىك جەلىلەردە اقش-تىڭ اسكەري ۇشاقتارىنا ىلەسىپ جۇگىرىپ كەلە جاتقان ادامداردىڭ ۆيدەولارى تاراعان، ءتىپتى كەيبىرەۋلەر ۇشۋ كەزىندە ۇشاققا جابىسقان. بىرنەشە ادام ۇشاقتان قۇلاپ قازا تاپقان. 

لوندوننان حابار تاراتاتىن The Daily Mail باسىلىمى اۋەجايدا جالپى سەگىز ادام قايتىس بولعانىن حابارلادى. ولاردىڭ ەكەۋىن اقش اسكەرلەرى اتىپ ولتىرگەن، ۇشەۋى رەاكتيۆتى ۇشاقتاردان قۇلاپ قازا تاپقان، ۇشەۋى كوتەرىلگەن ۇشاقتاردان قۇلاپ كوز جۇمعان. ال، كەيبىر اقپاراتتار جەتى ادام قايتىس بولعانىن جازادى.

مالىمەتتەرگە سايكەس، تاليبان دا، اقش اسكەرلەرى دە حالىقتى تاراتۋ ءۇشىن ەسكەرتۋ وعىن اتقان، ال امەريكالىق ساربازدار حالىقتى تىنىشتاندىرۋ ءۇشىن Apache تىكۇشاعىن قولدانعان.

ۆاشينگتون شەنەۋنىكتەرى كاتار استاناسى دوحادا تالىپتەرمەن كەزدەسىپ، اقش ديپلوماتيالىق قىزمەتكەرلەرى مەن امەريكالىق كۇشتەرگە كومەكتەسكەن اۋعانداردى ەۆاكۋاسيالاۋدى جالعاستىرۋ تۋرالى كەلىسىمگە كەلدى.

جاساندىسەرىكتەن تۇسىرىلگەن سۋرەتتەردە شەتەل كۇشتەرىمەن بايلانىسى جوق بەيبىت اۋعاندار دا اۋەجايعا اعىلعانى كورىنەدى. كەيبىرەۋلەرى كولىكتەرىن كوشە ورتاسىندا قالدىرىپ كەتكەنى، قاراقۇرىم حالىقتىڭ اۋەجايعا جينالىپ، قاشۋعا تىرىسىپ جاتقانى بايقالادى. ءتىپتى ەل ىشىندە اسكەري كۇشتەرمەن رەسمي بايلانىسى بار ادامدار دا كابۋلدان كەتۋدە قيىندىقتار بولعانىن حابارلادى.

– ءبىز تالىپتەردىڭ اسكەري قىزمەتكەرلەردى جاپپاي ولتىرگەنى تۋرالى ۆيدەولاردى جانە كانداگار مەن باسقا دا ءىرى قالالاردا بەيبىت تۇرعىنداردى نىساناعا العان ۆيەولاردى كوردىك. كەيبىر اۋدانداردا (تالىپتەر) ءتىزىم جاساپ، ۇيلەردى ارالاپ ىزدەپ ادامداردى ءولتىرىپ جاتقانى تۋرالى اقپارات كەلىپ ءتۇسىپ جاتىر. ءقازىردىڭ وزىندە قالادا نىساناعا الىنعاندار مەن توناۋ جايتتارى تۋرالى حابارلار بار. كابۋل تۇرعىندارى ءدال ءقازىر قورقىنىشپەن ءومىر سۇرۋدە، – دەيدى اۋعانستاننىڭ بۇۇ-داعى ەلشىسى گۋلام يساكزاي.