تاليبان ۇيىمىنىڭ وكىلى سۋحەيل شاحين دوحادا Sky News باسىلىمىنا سۇحباتتاسىپ، اڭگىمە بارىسىندا اقش پەن ۇلىبريتانيا بەلگىلەنگەن مەرزىمدە اسكەرىن اۋعانستاننان شىعارماسا، سالدارى اۋىر بولاتىنىن ايتتى.
ول بايدەننىڭ اسكەرىن ەلدەن 31 تامىزدا شىعاراتىنى تۋرالى ايتقانىن ەسكە الىپ، مەرزىمدى ۇزارتقىسى كەلسە، ونى باسىپ الۋدى جالعاستىرۋ دەپ باعالايتىنىن، مۇنىڭ ەش قاجەتى جوعىن جەتكىزدى.
– ەگەر اقش پەن ۇلىبريتانيا ەۆاكۋاسيانى جالعاستىرۋ ءۇشىن قوسىمشا ۋاقىت ىزدەيتىن بولسا، ءبىزدىڭ بەرەر جاۋابىمىز تەرىس بولادى. نەمەسە مۇنىڭ سالدارى بولادى. بۇل ءبىزدىڭ سەنىمسىزدىگىمىزدى تۋدىرادى. ەگەر ولار (اقش پەن ۇلىبريتانيا - رەد) باسقىنشىلىقتى جالعاستىرعىسى كەلسە، ءبىز ءۇنسىز قالمايمىز، – دەدى ول.
بۇعان دەيىن اقش پرەزيدەنتى دجو بايدەن اۋعانستاننان امەريكالىقتاردى، ءقاۋىپ ءتونۋى ىقتيمال اۋعانداردى ەۆاكۋاسيالاۋ قارقىنى جىلدامداعانىن، ادامداردى ەلدەن شىعارۋ مەرزىمىن ۇزارتۋ بويىنشا تاليبان ۇيىمىمەن كەلىسسوز ءجۇرىپ جاتقانىن ايتقان. تاراپتار اراسىنداعى كەلىسىم بويىنشا ەۆاكۋاسيانىڭ سوڭعى كۇنى 31 تامىزعا سايكەس كەلەدى.
كابۋل اۋەجايى ماڭىندا ەلدەن كەتكىسى كەلەتىن اۋعاندىقتار ءنوپىرى ءالى باسىلار ەمەس. ەلدەن شەتەل اسكەرى شىعارىلعان سوڭ اۋعانستانداعى جاعداي ۋشىعا ءتۇسۋى مۇمكىن دەگەن ءقاۋىپ بار. قازىرگى تاڭدا كابۋل اۋەجايىن اقش پەن ونىڭ وداقتاستارى كۇزەتىپ تۇر.
پىكىر قالدىرۋ