كاسىپكەر، قوعام بەلسەندىلەرى مارعۇلان سەيسەمباي مەن مۇحتار تايجان اراسىنداعى سوت پروسەسىنە نۇكتە قويىلدى.
مۇحتار تايجان بۇعان دەيىن سوتتا جەڭىپ شىققانىن، مارعۇلان سەيسەمباي جۇرت الدىندا كەشىرىم سۇراۋعا مىندەتتەلگەنىن ايتقان. ەندى مىنە، سەيسەمباي سوت شەشىمىن ورىنداپ، تايجاننان كەشىرىم سۇراپ وتىر. ول سونداي-اق ەكەۋارا داۋدىڭ جاي-جاپسارىن تۇسىندىرە كەتتى. ونىڭ سوزدەرىنەن سوت پروسەسى مۇحتار تايجان ايتقاننان مۇلدە باسقاشا وربىگەنىن ۇعۋعا بولادى.
مۇحتار تايجان مالىمدەمەلەرىندە سوتتا جەڭىپ شىققانىن بىرنەشە رەت قايتالاسا، مارعۇلان سەيسەمباي سوت بارىسىندا ءىس تۋرالى جاق اشپادى. ال داۋ مارعۇلان سەيسەمبايدىڭ 2020 جىلعى 25 ساۋىردە مۇحتار تايجان تۋرالى الەۋمەتتىك جەلىدە جازعان جازباسىنان باستالعان. ول جەردە سەيسەمباي تايجانعا 237 100 مىڭ دوللار اقشا بەرگەنىن، تايجان مەن ونىڭ وتباسىن ءتۇرلى ماسەلەلەر بويىنشا مورالدىق جانە ماتەريالدىق جاعىنان قولداپ كەلگەنىن، سوعان قاراماستان تايجان ءوزىن قارالاپ، اقپاراتتىق سوعىس جاريالاپ، بيلىكتىڭ تاپسىرماسىن ورىنداپ وتىرعانىن جازادى. "تۋعان اناڭ مەن پياز ەككەن بايعۇس فەرمەرلەرمەن سوتتاسقانىڭدى ەسكەرسەك، سەنەن ءبارىن كۇتۋگە بولادى" دەگەن ءسوز ايتادى. داۋ ارتىنشا، تاراپتاردىڭ سوتتاسۋىنا ۇلاسادى.
مارعۇلان سەيسەمباي باستاپقىدا باسپا ءسوز وكىلدەرىنىڭ سوتقا قاتىسۋىنا قارسى بولعانىنىڭ سەبەبىن "حايپ جاساۋدى قالاماعانىمەن" تۇسىندىرەدى. الايدا تايجاننىڭ سىڭارجاق اقپارات بەرۋىن كورگەن سوڭ، ءباسپاسوزدى سوت ىسىنە قاتىستىرۋدى سۇراعانىن جەتكىزگەن.
كاسىپكەردىڭ سوزىنشە، ول تايجاننىڭ وزىنە قاتىستى جاساعان شاعىمىنىڭ 10 تارماعىنىڭ 9-ى بويىنشا جەڭىپ شىققان. ول جەڭىپ شىققان 9 تارماقتى اشىپ جازعىسى كەلمەيتىنىن، كەرەك بولسا، ادۆوكاتىنان ءىستىڭ ءمان-جايىن سۇراۋعا بولاتىنىن ايتادى.
"مەن تەك ءبىر تارماق بويىنشا جەڭىلدىم، ول جەردە "زاسۋديل سۆويۋ رودنۋيۋ مات ي سەسترۋ" دەگەن سوزدەردىڭ جالا ەكەندىگى ايتىلعان. سوت پوستتىڭ ورىس تىلىندەگى نۇسقاسىنا قاتىستى شەشىمدى ونىڭ پايداسىنا شەشتى. قازاق تىلىندەگى نۇسقاسىنا قاتىستى ول داۋلاسا المادى (ول جەردە "سوتتاسقان” دەپ دۇرىس جازىلعان). سوتتا ول ءوز اناسىمەن ەكى رەت سوتتاسقانى انىقتالدى. ءبىرىنشى رەت اناسىنىڭ "ءوزىنىڭ كۇتىمىنە اي سايىن 50 اەك كولىمىندە اليمەنت ءوندىرىپ الۋ بويىنشا" تالابىنا قاتىستى، ەكىنشىسى جىلجىمايتىن مۇلىككە قاتىستى داۋ. مەنىڭ "زاسۋديل» رودنۋيۋ مات ي سەسترۋ" دەگەن ءسوزىم تايجاننىڭ ار-نامىسىنا ءتيىپ، نۇقسان كەلتىرىپتى. ونىڭ ويىنشا، ول اناسىن «سوتقا بەرمەگەن» («زاسۋديل»)، قايتا اناسى وعان قارسى سوتقا ارىزدانعان. ال ول ءوز اناسىمەن سوتتاسقانى ءۇشىن ەش شىمىرىكپەيدى. مەن ارينە بۇل جايتتى كوتەرگەنىم ءۇشىن قىنجىلامىن. ەگەر ول قاتارداعى قاراپايىم ادام بولسا، بۇل ماسەلەنى ەشقاشان كوتەرمەس ەدىم. الايدا ول حالىق الدىندا ساياساتكەر، ءارى ادامگەرشىلى مول ادام رەتىندە كورىنۋگە ءۇمىت ەتىپ ءجۇر، سوندىقتان مۇنى ايتپاي كەتۋ دۇرىس ەمەس بولار ەدى. ال ەندى سوت شەشىمىن ورىنداي وتىرىپ، مەن ءوز پوستىمدا "ون زاسۋديل" سۆويۋ مات ي رودنۋيۋ سەسترۋ" دەپ قاتە جازعانىم ءۇشىن كوپشىلىك الدىندا مۇحتار تايجاننان كەشىرىم سۇرايمىن. اناسى مەن تۋعان باۋىرىن سوتقا بەردى ("زاسۋديل سۆويۋ رودنۋيۋ مات ي سەسترۋ") دەگەن ءسوزىمدى تەرىسكە شىعارامىن. "مۇحتار تايجان اناسىمەن ەكى رەت سوتتاسىپ، سوتتا ونى ەكى رەت جەڭدى" ("مۋحتار تايجان دۆاجدى سۋديلسيا سو سۆوەي ماتەريۋ ي دۆاجدى ۆىيگرال ەە ۆ سۋدە") دەپ جازعانىم دۇرىس بولادى ەكەن" دەيدى سەيسەمباي.
ال مۇحتار تايجان الەۋمەتتىك جەلىدە سوت پروسەسى 10 تارماقتان تۇرعانى تۋرالى ەشتەڭە دەمەي، تەك ءوزى جەڭىپ شىققان ءبىر تارماق تۋرالى عانا ايتقان.
مۇحتار تايجان بۇگىن جەلىدەگى پاراقشاسىندا "مارعۇلان سەيسەمبايدى كەشىرىم سۇراتقىزامىن دەگەن ۋادەمدە تۇردىم" دەپ ونىڭ كەشىرىم سۇراۋىن قابىل الاتىنىن مالىمدەدى. سول ارقىلى داۋعا نۇكتە قويىلعانىن ءبىلدىردى. ول سەيسەمباي جازباسىنىڭ تەك كەشىرىم سۇراعان تۇسىن عانا پايدانالىپ، ادامداردىڭ جەكە ومىرىنە ارالاسۋدىڭ دۇرىس ەمەستىگىن جەتكىزگەن.
