تالىپتەر بۇدان بىلاي ەلدەگى اۋعاندىقتاردى كابۋل اۋەجايىنا كىرگىزبەيتىنىن ايتتى. بۇل تۋرالى بي-بي-سي اقپارات اگەنتتىگى حابارلادى.
كابۋلدا وتكەن باسپا ءسوز ءماسليحاتىندا تاليبان وكىلى زابيحۋللا مۋجاحيد ايماقتاعى تارتىپسىزدىككە بايلانىستى اۋعانستان ازاماتتارىن اۋەجايعا كىرگىزبەيتىندەرىن مالىمدەدى. ول اۋەجايدىڭ اينالاسىنداعى حالىقتىڭ ۇيلەرىنە قايتۋعا شاقىرىپ، ولاردىڭ قاۋىپسىزدىگىنە كەپىلدىك بەرەتىنىن جەتكىزدى.
سونداي-اق ول اقش ۇكىمەتىنىڭ ادامداردى اۋەجايعا شاقىرۋىن جالعاستىرىپ جاتقانىنا قاتىستى بىلاي پىكىر ءبىلدىردى.
– ءبىز امەريكالىقتاردان اۋعاندىقتاردى ەلدەن كەتۋگە شاقىرماۋىن سۇرايمىز. ويتكەنى ولاردىڭ ىشىندەگى ءبىلىمدى، تالانتتىلارى بىزگە قاجەت، – دەدى مۋجاحيد.
زابيحۋللا مۋجاحيد ەلدەگى ب ا ق، اۋرۋحانالار، مەكتەپتەر، جەرگىلىكتى ءوزىن-وزى باسقارۋ ورگاندارى مەن ۋنيۆەرسيتەتتەر قايتادان جۇمىس ىستەي باستاعانىن دا ءسوز اراسىنا قوسا كەتتى.
ەلدەگى ەلشىلىكتەردىڭ قاۋىپسىزدىگىنە دە كەپىلدىك بەرەتىندەرىن ايتقان تاليبان وكىلى باسقا ەلدەردى ەلشىلىكتەرىن جاپپاۋعا شاقىردى.
پىكىر قالدىرۋ