شىمكەنت قالالىق كلينيكالىق بالالار اۋرۋحاناسىنىڭ ورتوپەد-تراۆماتولوگتارى 14 جاستاعى قىزعا كۇردەلى ورتوپەديالىق وپەراسيا جاسادى. وتا كەزىندە مەديسينا ماماندارى ءجاسوسپىرىمنىڭ قيسىق وسكەن شىنتاق سۇيەگىن حيرۋرگيالىق جولمەن قايتا قالپىنا كەلتىرىپ بەردى. بالالار دارىگەرلەرى مۇنداي وتانى العاش رەت جاساپ، وڭ ناتيجەگە قول جەتكىزىپ وتىر.

ناۋقاس وسىدان بىرنەشە جىل بۇرىن قولىن اۋىر جاراقاتتاپ، شىنتاق سۇيەگى ءوسىپ، كارى (لۋچيەۆايا) سۇيەگى وسپەي قالعان. سالدارىنان قولىنداعى سۇيەكتەرى قيسايىپ، وزدىگىنەن قيمىل جاساۋعا كەدەرگى كەلتىرگەن.

وتا جاسالعان ناۋقاس ءۇش اي بۇرىن قالالىق كلينيكالىق بالالار اۋرۋحاناسىنا كەڭەس الۋعا كەلگەن بولاتىن. تەكسەرە كەلە ناۋقاستا جاراقاتتىڭ سالدارىنان سۇيەگى قيسايعانى انىقتالدى. وپەراسيانى بىردەن جاسامادىق. سەبەبى مۇنداي وتا بالانىڭ سۇيەك ءوسۋى توقتاۋعا جاقىنداعان كەزدە جاسالادى. وپەراسيا كەزىندە قاتتى ءوسىپ كەتكەن سۇيەكتى قىسقارتىپ، وسپەي قالعان سۇيەككە جالعاپ، ارنايى قۇرىلعىمەن بەكىتىپ بەردىك. مۇنداي وتانى ءبىرىنشى رەت جاسادىق. وسىعان دەيىن سۇيەگى قيسىق وسكەن ناۋقاستارعا وتا جاساۋ ءۇشىن نۇر-سۇلتان قالاسىنداعى ەمدەۋ مەكەمەلەرىنە جولداما ارقىلى جىبەرەتىنبىز. ەندى مىنە مۇنداي وتانى ءوزىمىز جاساۋعا دايىنبىز.