پرەزيدەنت قاسىم-جومارت توقايەۆ قازاقستان حالقىنا ارناعان جولداۋىندا بيۋدجەت ەسەبىنەن قارجىلاندىرىلاتىن ءبىرقاتار سالا قىزمەتكەرلەرىنىڭ جالاقىسى وسەتىنىن مالىمدەدى. 

– 2022 جىلدان 2025 جىلعا دەيىن وسى ساناتتاعى (مادەنيەت قىزمەتكەرلەرى، مۇراعاتشىلار، كىتاپحاناشىلار، تەحنيكالىق قىزمەتكەرلەر، قورىقشىلار، كولىك جۇرگىزۋشىلەر) ازاماتتىق قىزمەتكەرلەردىڭ جالاقىسى جىل سايىن ورتاشا ەسەپپەن 20 پايىزعا وسەدى، – دەدى پرەزيدەنت.

قاسىم-جومارت توقايەۆ كەلەسى جىلدان باستاپ ەڭ تومەنگى جالاقىنى كوتەرۋدى تاپسىردى.

– ەڭ تومەنگى جالاقىنى قايتا قارايتىن ۋاقىت كەلدى دەپ ويلايمىن. ونىڭ مولشەرى 2018 جىلدان بەرى كوتەرىلگەن جوق. ال الەمدىك كوروناداعدارىس حالىقتىڭ تابىسىنا كۇش سالدى. بۇدان بولەك، مينيمالدى جالاقىنىڭ مولشەرى جاعىنان قازاقستان تمد-نىڭ ءبىرقاتار ەلىنەن قالىپ قويدى، – دەدى پرەزيدەنت پارلامەنت پالاتالارىنىڭ بىرلەسكەن وتىرىسىندا.

ول 2022 جىلدىڭ 1 قاڭتارىنان باستاپ ەڭ تومەنگى جالاقىنى 42 500 تەڭگەدەن 60 000 تەڭگەگە دەيىن كوتەرۋدى تاپسىردى.