مەملەكەت باسشىسىنىڭ تاپسىرماسى اياسىندا شىمكەنت قالاسىندا ءبىلىم بەرۋ ينفراقۇرىلىمى دامىپ كەلەدى. «تۇران» شاعىناۋدانىنداعى جاڭادان پايدالانۋعا بەرىلگەن №79 جالپى ورتا مەكتەبىنىڭ مەرەكەگە ارنالعان «تاۋەلسىزدىك جەتىستىكتەرى» اتتى سالتاناتتى جيىنىندا قالا اكىمى مۇرات ايتەنوۆ وسىلاي دەدى.

بارشا ۇستازدار مەن شاكىرتتەردى ءبىلىم كۇنىمەن جانە جاڭا مەكتەپتىڭ اشىلۋىمەن قۇتتىقتاعان قالا باسشىسى مەكتەپ تابالدىرىعىن العاش رەت اتتاپ وتىرعان ءبىرىنشى سىنىپتىڭ بۇلدىرشىندەرىنە ساتتىلىك تىلەپ، ولارعا الىپپە تابىستادى.

مۇرات ايتەنوۆ، شىمكەنت قالاسىنىڭ اكىمى
- بيىلعى جاڭا وقۋ جىلى قازاقستان رەسپۋبليكاسى تاۋەلسىزدىگىنىڭ 30 جىلدىق مەرەيتويى قارساڭىندا باستالعالى وتىر. تاۋەلسىزدىك جىلدارىندا شىمكەنت قالاسىنىڭ ءبىلىم سالاسى ۇلكەن جەتىستىكتەرگە جەتتى. وسىدان وتىز جىل بۇرىن قالادا 69 مىڭ وقۋشىسى بار 72 مەكتەپ بولسا، ءقازىر 233 مىڭنان اسا وقۋشى وقيتىن 203 مەكتەپ بار. بيىلعى وقۋ جىلىن قالا مەكتەپتەرى 233 879 وقۋشىمەن باستاعالى وتىر. وتكەن جىلمەن سالىستىرعاندا 8 مىڭ وقۋشىعا كوپ. ونىڭ ىشىندە 25 مىڭ وقۋشى العاش رەت مەكتەپ تابالدىرىعىن اتتادى.

قالا اكىمى بالالاردىڭ قاۋىپسىزدىگىن قامتاماسىز ەتۋ ءۇشىن مەكتەپتەر بەينە باقىلاۋ جۇيەسىمەن جابدىقتالىپ، تۋرنيكەتتەر قويىلىپ، دابىل باتىرمالارى ورناتىلعانىن، مەكتەپتەردىڭ ماتەريالدىق-تەحنيكالىق بازاسىن نىعايتۋ بويىنشا جۇمىستار جۇيەلى تۇردە جۇرگىزىلىپ كەلەتىنىن ايتتى. سونىمەن بىرگە، جاڭا موديفيكاسيالانعان جابدىقتارمەن قامتاماسىز ەتۋ ماقساتىندا 263 كابينەت، 178 ينتەراكتيۆتى تاقتا ورناتۋ جۇمىستارى جۇرگىزىلدى. ناتيجەسىندە، جاڭا موديفيكاسيالانعان جابدىقتارمەن قامتىلعان ءپان كابينەتتەر ۇلەسى 32،5%-دان 65%-عا جەتتى. بۇل جۇمىستار جالعاسىن تاباتىن بولادى.

قالا اكىمىنىڭ قاتىسۋىمەن اشىلعان مەكتەپتە 897 وقۋشى ءبىلىم الاتىن بولادى. شاھار باسشىسى اۋىل قاريالارىمەن بىرگە جاڭا مەكتەپتى ارالاپ، ونداعى سپورت زال، اباي سىنىبى، شاحمات، ەڭبەك، تىگىن شەربەرحانالارى مەن اسحانانى ارالاپ كوردى. قۇرىلىستىڭ ساپاسى مەن ديزاينىنا ءمان بەرگەن مۇرات ايتەنوۆ مۇنداعى جۇمىستارعا وڭ باعاسىن بەردى. مەكتەپ ديرەكتورىنا سانيتارلىق شارالاردىڭ ساقتالۋىن قامتاماسىز ەتۋدى تاپسىردى.

زامان تالابىنا ساي جابدىقتالىپ، بالالاردىڭ تولىققاندى ءبىلىم الۋىنا، سالاۋاتتى ءومىر سالتىن قالىپتاستىرۋىنا جاعداي جاسايتىن 1200 ورىندىق وقۋ ورنى 3 قاباتتان تۇرادى. ەكى اۋىسىمدا جۇمىس جۇرگىزەتىن مەكتەپتە 44 وقۋ بولمەلەرى قاراستىرىلعان. بۇدان باسقا جاڭا ۇلگىدەگى 8 مۋلتيمەديالى-لينگوفوندى كابينەت، 3 ينفورماتيكا كابينەتى، ول 85 دانا كومپيۋتەر جانە 3 ينتەراكتيۆتى تاقتامەن جابدىقتالعان. سونداي-اق، 4 شەبەرحانا بولمەسى، سالاۋاتتى ءومىر سالتىن قالىپتاستىرۋعا ارنالعان سپورت زال مەن بالالاردىڭ دەنساۋلىعىن قاداعالايتىن ەكى مەدپۋنكت قاراستىرىلعان.

ايتا كەتەيىك، پاندەمياعا بايلانىستى ءبىلىم تابالدىرىعىن العاش اتتاعان بۇلدىرشىندەر ءۇشىن عانا مەكتەپ اۋلاسىندا العاشقى قوڭىراۋ سالتاناتتى جيىنى ءوتتى. قالعان سىنىپ وقۋشىلارىنا سانيتارلىق تالاپتاردى ساقتاي وتىرىپ، سىنىپ ساعاتى ۇيىمداستىرىلدى.