رەسەي سىرتقى ىستەر مينيسترلىگىنىڭ باسپا ءسوز حاتشىسى ماريا زاحاروۆا اقش ۋكراينانى رەسەيگە قارسى "قارۋ" رەتىندە قولدانىپ وتىرعانىن مالىمدەدى. بۇل تۋرالى lenta.ru سايتى حابارلادى.
ماسكەۋدە وتكەن باسپا ءسوز كونفەرەنسياسىندا ماريا زاحاروۆا اقش پەن ۋكراينا اراسىنداعى قارىم-قاتىناس تۋرالى ءسوز قوزعادى. زاحاروۆا ۋكراينا پرەزيدەنتى ۆلاديمير زەلەنسكييدىڭ امەريكا قۇراما شتاتتارىنا بارعانىن اتاپ ءوتىپ، پىكىر ءبىلدىردى.
– ۆاشينگتون كييەۆتى رەسەيگە قارسى قارۋ رەتىندە قولدانۋدا، بۇل ۋكراينا ءۇشىن اۋىر زارداپتارعا اكەلۋى مۇمكىن، – دەدى ماريا زاحاروۆا.
زاحاروۆا سونىمەن قاتار اقش-تىڭ كييەۆكە اسكەري كومەك كورسەتۋ جوسپارىنا ماسكەۋدىڭ الاڭداۋشىلىعىن ءبىلدىردى. ونىڭ ايتۋىنشا، بۇل – ۋكرايناداعى جاعدايدى رەتتەۋگە تەرىس اسەر ەتەدى.
زاحاروۆا ۋكراينانىڭ شىعىسىنداعى دونباس ماسەلەسىنە دە توقتالا كەلىپ، بۇل جەردە "ازاماتتىق سوعىس" ءجۇرىپ جاتقانىن العا تارتىپ، حالىقارالىق قاۋىمداستىقتى ۋكرايناعا قارۋ جەتكىزۋگە تىيىم سالۋعا شاقىردى.
بۇعان دەيىن ۋكراينا پرەزيدەنتى ۆلاديمير زەلەنسكيي ۆاشينگتونعا ساپارى كەزىندە قورعانىس سەرىكتەستىگىنىڭ نەگىزدەرى تۋرالى ۇكىمەتارالىق كەلىسىمگە جانە بىرنەشە قۇجاتقا قول قويعانى بەلگىلى بولدى. قۇجات ەرەجەلەرى ارقىلى قارۋ-جاراق پەن اسكەري تەحنيكانى سىناۋ رەتتەلمەك.
پىكىر قالدىرۋ