بوكستان قازاقستان كومانداسىنىڭ باس باپكەرى عالىمبەك كەنجەبايەۆ ءوز ەركىمەن قىزمەتىنەن كەتتى. بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا مالىمدەدى.

– ۇلتتىق قۇرامانىڭ باس باپكەرى قىزمەتىنەن ءوز ەركىممەن كەتتىم. باسشىلار وتستاۆكاعا قول قويدى. ەشكىمگە وكپە جوق. 2،5 جىل جۇمىلىپ ەڭبەك ەتتىك. كوماندادا تاجىريبەلى باپكەرلەر دە، ىسىلعان بوكسشىلار دا بولدى. قولىمىزدان كەلگەنىن ىستەدىك. ەشكىمنىڭ جەلكەسىنەن سۇيرەپ، چەمپيون قىلعام جوق. ىرىكتەۋدەن ەلدەگى ەڭ مىقتى دەگەن بوكسشىلار ءوتتى. وليمپياداعا نەگە بارماي قالعاندارىن ول جىگىتتەر جاقسى بىلەدى، ادام ءوز كەمشىلىگىن مويىنداپ ۇيرەنگەنى دۇرىس.

ءبىزدىڭ قالاۋىمىز بولا بەرمەيتىنىن وليمپيادا كورسەتتى. ەڭ ءبىر وكىنەتىن تۇسىم – سابىرحان ماحمۇدقا مۇمكىندىك بەرە الماعانىم. ءبىراق، سابىرحان سەكىلدى جىگىتتەر اسىل تاس سەكىلدى، سۋ تۇبىندە كوپ جاتپايدى، باعى جانسا، حالىقارالىق رينگتە قازاققا ءالى تالاي جۇلدە سىيلايدى. مەن ماحمۇدقا شىن كوڭىلىممەن تىلەكتەسپىن. ەلىمىز امان بولسىن. قازاق بوكسىنا ساتتىلىك تىلەيمىن، – دەدى ع. كەنجەبايەۆ.

عالىمبەك كەنجەبايەۆ ۇلتتىق قۇرامانىڭ باس باپكەرى قىزمەتىنە 2018 جىلدىڭ جەلتوقسانىندا تاعايىندالعان بولاتىن.

توكيو وليمپياداسىندا قازاقستاندىق بوكسشىلاردىڭ بىردە-بىرى فينالعا شىعا العان جوق. بوكسشى قامشىبەك قوڭقابايەۆ پەن ساكەن بيبوسىنوۆ قولا جۇلدە يەلەنسە، قالعان 6 بوكسشى جارتىلاي فينالعا جەتپەي جەڭىلىپ قالدى. وسىلايشا وتاندىق بىلعارى قولعاپ شەبەرلەرى تاۋەلسىزدىك العان جىلدان بەرى العاش رەت ەلگە التىن مەدالسىز ورالدى.