پەداگوگيكا جانە مەديسينا باعىتتارىندا وقيتىن جوعارى وقۋ ورىندارى ستۋدەنتتەرىنىڭ شاكىرتاقىسى ءوستى، دەپ حابارلادى KazTag اقپارات اگەنتتىگى.
3 قىركۇيەكتەگى ۇكىمەت قاۋلىسى بويىنشا مەملەكەتتىك ستيپەنديا مولشەرى، ونى تاعايىنداۋ جانە تولەۋ ەرەجەلەرىنە وزگەرىستەر ەنگىزىلگەن.
"ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017 – 2021 جىلدارعا ارنالعان "ەڭبەك" مەملەكەتتىك باعدارلاماسىنىڭ ءبىرىنشى باعىتى اياسىندا ءبىلىم الۋشىلارعا مەملەكەتتىك ستيپەنديا ارالىق اتتەستاتتاۋدىڭ (ەمتيحان سەسسياسىنىڭ) ناتيجەلەرىنە قاراماستان تولەنەدى" دەپ مالىمدەدى.
ءبىرىنشى اكادەميالىق كەزەڭگە ستيپەنديا مەملەكەتتىك تاپسىرىس بويىنشا ءبىرىنشى كۋرسقا (ءبىرىنشى وقۋ جىلىنا) قابىلدانعان بارلىق ستۋدەنت پەن ماگيسترانتقا تاعايىندالىپ، 1 قىركۇيەكتەن باستاپ ءبىرىنشى اكادەميالىق كەزەڭ مەن كانيكۋل اياقتالعانعا دەيىن اي سايىن تولەنەدى.
مەملەكەتتىك ءبىلىم بەرۋ تاپسىرىسى بويىنشا وقيتىندارعا تولەنەتىن اي سايىنعى ستيپەنديانىڭ مولشەرى:
- دايارلاۋدىڭ پەداگوگيكالىق باعىتتارىندا جانە "دەنساۋلىق ساقتاۋ" باعىتى بويىنشا وقيتىن ستۋدەنتتەردى قوسپاعاندا، جوعارى ءبىلىم بەرۋ باعدارلامالارىن ىسكە اسىراتىن ءبىلىم ۇيىمدارىندا وقيتىن ستۋدەنتتەرگە – 31 423 تەڭگە؛
- جوعارى ءبىلىم بەرۋ باعدارلامالارىن ىسكە اسىراتىن ءبىلىم ۇيىمدارىندا دايارلاۋدىڭ پەداگوگيكالىق باعىتتارىندا وقيتىن ستۋدەنتتەرگە – 50 400 تەڭگە؛
- جوعارى ءبىلىم بەرۋ باعدارلامالارىن ىسكە اسىراتىن ءبىلىم ۇيىمدارىندا دايارلاۋدىڭ "دەنساۋلىق ساقتاۋ" باعىتى بويىنشا وقيتىن ستۋدەنتتەرگە – 50 400 تەڭگە؛
- ينتەرندەرگە – 59 289 تەڭگە؛
- ماگيسترانتتارعا – 76 950 تەڭگە؛
- "نازاربايەۆ ۋنيۆەرسيتەتى" دەربەس ءبىلىم بەرۋ ۇيىمىندا وقيتىن ماگيسترانتتارعا – 143 750 تەڭگە؛
- دوكتورانتتارعا – 172 500 تەڭگە؛
- دايارلاۋدىڭ "دەنساۋلىق ساقتاۋ" باعىتى بويىنشا دوكتورانتتارعا – 172 500 تەڭگە؛
- دايارلاۋدىڭ "دەنساۋلىق ساقتاۋ" باعىتى بويىنشا دارىگەر-رەزيدەنتتەرگە جانە ماگيسترانتتارعا – 88 494 تەڭگە؛
- مەملەكەتتىك ورگانداردان وقۋعا جىبەرىلگەن قازاقستان جوعارعى سوتىنىڭ جانىنداعى سوت تورەلىگى اكادەمياسىنىڭ ماگيسترانتتارىنا سوڭعى جۇمىس ورنى بويىنشا لاۋازىمدىق ەڭبەكاقىسىنىڭ، ءبىراق مەملەكەتتىك ءبىلىم بەرۋ تاپسىرىسى بويىنشا ءبىلىم الاتىن ماگيسترانتتار ءۇشىن بەلگىلەنگەن مەملەكەتتىك ستيپەنديادان تومەن ەمەس دەڭگەيدە؛
- تەحنيكالىق جانە كاسىپتىك ءبىلىم بەرۋ باعدارلامالارىن ىسكە اسىراتىن ءبىلىم بەرۋ ۇيىمدارىندا جۇمىسشى بىلىكتىلىكتەرى بويىنشا وقيتىن ستۋدەنتتەرگە – 21 787 تەڭگە؛
- تەحنيكالىق جانە كاسىپتىك (ورتا بۋىن ماماندارىن دايارلاۋدى كوزدەيتىن)، ورتا بىلىمنەن كەيىنگى ءبىلىمنىڭ ءبىلىم بەرۋ باعدارلامالارىن ىسكە اسىراتىن ءبىلىم ۇيىمدارىندا وقيتىن ستۋدەنتتەردىڭ مەملەكەتتىك ستيپەندياسى – 20 948 تەڭگە مولشەرىندە بەلگىلەنەدى.
"ارال وڭىرىندەگى ەكولوگيالىق قاسىرەت سالدارىنان زارداپ شەككەن ازاماتتاردى الەۋمەتتىك قورعاۋ تۋرالى" زاڭعا سايكەس، ەكولوگيالىق اپات ايماعىندا تۇراتىن ءبىلىم الۋشىلارعا ستيپەنديا تولەۋ ەكولوگيالىق جاعىنان قولايسىز جاعدايدا تۇرعانى ءۇشىن كوەففيسيەنت قولدانىلا وتىرىپ بەلگىلەنەدى.
قاۋلى ءبىرقاتار نورمانى قوسپاعاندا، العاشقى رەسمي جاريالانعان كۇننەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى.
پىكىر قالدىرۋ