سولتۇستىك قازاقستان وبلىسىندا تاۋ-كەن بايىتۋ كومبيناتىنىڭ قىزمەتكەرلەرى 11 كۇننەن بەرى اشتىق جاريالاپ جاتىر. كەنشىلەردىڭ سوزىنشە، وبۋحوۆ تاۋ-كەن بايىتۋ كومبيناتىن بىرەۋلەر رەيدەرلىك جولمەن باسىپ الماقشى. وسىلايشا نارازىلىققا شىققان جۇمىسشىلار تابىسسىز قالامىز با دەپ الاڭداۋلى.
ءوندىرىستى مۇلدەم توقتاتىپ تاستاۋ ءۇشىن الدەكىمدەر كومبيناتتاعى ەلەكتر ەنەرگياسىن ءسوندىرىپ تاستاعان. اشىنعان حالىق كومپانيا باسشىلارىنا تالاپتارىن ايتىپ، اشتىق جاريالاۋدى جالعاستىرۋدا.
– سىبايلاس جەمقورلىققا جول جوق. ءبىزدىڭ ماسەلەمىزگە نازار اۋدارمايىنشا اشتىقتى جالعاستىرا بەرەمىز. اشتىققا دايىنبىز، – دەيدى جۇمىسشىلار.
كومبيناتتا قىزمەت ەتىپ، ادال اسىن تاۋىپ وتىرعان 500-گە جۋىق قىزمەتكەر نۇر-سۇلتاندا بەيبىت ميتينگ وتكىزبەك بولعان. ءبىراق، پوليسيا ولاردى اۋىلدان شىققان بويدا ۇستاپ اكەتكەن. كومپانيا باسشىلىعى مۇنى اكىمدىك پەن رەسەيلىك قۇرىلتايشىلاردىڭ ادەيى جاساپ جاتقان ءىسى دەپ توپشالادى.
– بىزبەن 10 جىلدان استام ۋاقىت سەرىكتەس بولعان رەسەيلىك كومپانيا ءوزىمىزدىڭ "Tioline" كومپانياسىن السىرەتىپ، تولىقتاي ءوز قاراماعىنا وتكىزىپ العىسى كەلىپ وتىر. قۇرىلتايشىلاردىڭ ونداعى نەگىزگى ماقساتى – اكتيۆتەردى رەسەيلىك ءىرى "باشقۇرت سودا" كومپانياسىنا ساتۋ. بۇل دەگەنەمىز – قازاقستان ءوزىنىڭ مىقتى تاۋ-كەن ورنىن شەتەلدىكتەرگە قولدان بەرە سالادى دەگەن ءسوز، – دەيدى كومپانيانىڭ اتقارۋشى ديرەكتورى ۆيكتور دولگاليەۆ.
وبۋحوۆ تاۋ-كەن بايىتۋ كومبيناتىنىڭ جۇمىسشىلارى نارازىلىق ءبىلدىرىپ، ماسەلەگە مەملەكەتتىك ورگاندار نازار اۋدارۋىن سۇرايدى.
پىكىر قالدىرۋ