پرەزيدەنت ق.توقايەۆ جامبىل وبلىسىنىڭ اكىمى بەردىبەك ساپاربايەۆتىڭ ەسەبىن تىڭدادى، دەپ حابارلادى پرەزيدەنتتىڭ باسپا ءسوز حاتشىسى بەرىك ءۋالي الەۋمەتتىك جەلىدەگى پاراقشاسىندا.
قاسىم-جومارت توقايەۆ بەردىبەك ساپاربايەۆتىڭ بايزاق اۋدانىندا بولعان توتەنشە جاعدايدىڭ سالدارىن جويۋ جونىندەگى ەسەبىن تەلەفون ارقىلى تىڭداعان. پرەزيدەنتكە 122 جىلجىمايتىن مۇلىكتىڭ، سونىڭ ىشىندە 106 تۇرعىن ءۇي، 12 كوممەرسيالىق جانە 4 الەۋمەتتىك نىساننىڭ قيراعانى جونىندە باياندالدى. قازىرگى ۋاقىتتا 12 مەكەمە، 23 تەحنيكا مەن 185 جۇمىسشى قايتا قالپىنا كەلتىرۋ جۇمىستارىنا جۇمىلدىرىلعان.
جامبىل وبلىسى اكىمىنىڭ ايتۋىنشا، بۇگىنگە دەيىن 62 تۇرعىن ءۇي جوندەلگەن. جالپى قايتا قالپىنا كەلتىرۋ جۇمىستارىن 10 قاراشاعا دەيىن اياقتاۋ جوسپارلانىپ وتىر. جىبەك جولى اۋىلىنداعى قيراعان №5 ورتا مەكتەپتىڭ ورنىنا جاڭا مەكتەپ سالىنادى. بەردىبەك ساپاربايەۆتىڭ مالىمەتى بويىنشا 26 ادام ستاسيوناردا ەم الىپ جاتىر. ولاردىڭ 15ء-ى گوسپيتالدا ەمدەلىپ جاتقان اسكەري، پوليسيا جانە توتەنشە جاعدايلار جونىندەگى دەپارتامەنت قىزمەتكەرى.
"جارىلىستان قازا بولعانداردىڭ وتباسىلارىنا ماتەريالدىق كومەك كورسەتىلۋدە، سونداي-اق زارداپ شەككەن وتباسىلاردىڭ جۇمىسسىز مۇشەلەرىن جۇمىسقا ورنالاستىرۋ ماسەلەسى شەشىلىپ جاتىر. ەكىنشى دەڭگەيلى بانكتەرگە قارىزى بار مۇنداي وتباسىلاردىڭ كرەديتتەرىن وتەۋ ماسەلەسى تولىق شەشىلگەن" دەلىنگەن اقپاراتتىق حابارلامادا.
پىكىر قالدىرۋ