"اۋعانستان جاپپاي كەدەيلىك شەگىندە تۇر" دەپ حابارلاندى بىرىككەن ۇلتتار ۇيىمىنىڭ دامۋ باعدارلاماسى (بۇۇدب) جاريالاعان زەرتتەۋدە.

بىرىككەن ۇلتتار ۇيىمى ۇزاق ۋاقىتقا سوزىلعان قۇرعاقشىلىق، ازىق-تۇلىك تاپشىلىعى جانە جالعاسىپ جاتقان كوۆيد-19 پاندەمياسىنان تۋىنداعان گۋمانيتارلىق داعدارىستان اۋعانستان حالقىنىڭ شامامەن 97 پايىزى كەدەيلىك شەگىنەن تومەن ءومىر ءسۇرۋى مۇمكىن ەكەنىن ەسكەرتتى.

بۇۇ اقپاراتىنشا، اۋعانستاندا كەدەيلىك دەڭگەيى 25 پايىزعا ۋشىعۋى مۇمكىن.

زەرتتەۋ بارىسىندا اۋعانستانداعى اۋىر جاعدايدىڭ ءتورت بولجامدى سەنارييى تالداندى.

ەڭ ناشار سەناريي بويىنشا، بارلىق نەگىزگى سەرىكتەستەرمەن ەكى ايلىق ساۋدا-ساتتىقتىڭ ءۇزىلۋى، كاپيتالدى جۇمساۋ تيىمدىلىگىنىڭ ءتورت پايىزعا تومەندەۋى مەن سىرتپەن بايلانىستىڭ توقتاۋى سياقتى فاكتورلار اۋعانستانداعى كەدەيشىلىك دەڭگەيىنىڭ 72 پايىزعا جەتۋىنە اكەلۋى مۇمكىن.

سوڭعى جيىرما جىلداعى قاقتىعىستار سالدارىنان اۋعانستانداعى جاعداي وتە اۋىر داعدارىسقا ۇشىرادى.

زەرتتەۋ كورسەتكەندەي، اۋعانستاندا مەملەكەتتىك قارجىنىڭ قۇلدىراۋى، شەتەل رەزەرۆتەرىنىڭ جابىلۋى جانە بانك جۇيەسىنە قىسىم كۇشەيۋى ىقتيمال.

قازىرگى ۋاقىتتا اۋعانستان ورتالىق بانكىنىڭ شەتەلدەگى 10 ميلليارد دوللارعا جۋىق اكتيۆتەرى بۇعاتتالعان. بۇل جاڭا اكىمشىلىكتىڭ نەگىزگى قوزعاۋشى كۇشى بولىپ سانالادى.

بىرىككەن ۇلتتار ۇيىمى اۋعانستان قوعامىنىڭ "تولىق كۇيرەۋ" ءقاۋپى بار ەكەنىن ەسكەرتتى. تاليبان ۇكىمەتىنە الاڭداۋشىلىق بىلدىرگەنىنە قاراماستان، حالىقارالىق قاۋىمداستىق اۋعانستانعا اقشا اعىنىن ۇستاپ تۇرۋدىڭ جولىن تابا المادى.

بۇۇ-نىڭ اۋعانستان بويىنشا ارنايى وكىلى دەبورا لايونس بەيسەنبى كۇنى قاۋىپسىزدىك كەڭەسىندە اۋعانستاندى سۇراپىل داعدارىس كۇتىپ تۇرعانىن ايتىپ، "ەكونوميكا مەن الەۋمەتتىك ءتارتىپتىڭ تولىق قيراۋىنا جول بەرمەۋ ءۇشىن" ەلگە اقشا قۇيۋدىڭ جولىن ىزدەۋ كەرەكتىگىن ايتتى. داعدارىس، ونىڭ ىشىندە ۆاليۋتانىڭ قۇلدىراۋى، ازىق-تۇلىك پەن جانارماي باعاسىنىڭ كۇرت ءوسۋى جانە جەكە بانكتەردە قولما-قول اقشانىڭ بولماۋى ايتىلدى. "بيلىكتىڭ جالاقى تولەۋگە قاراجاتى دا جوق" دەدى ول.

– ەكونوميكاعا تاعى بىرنەشە اي تىنىستاۋعا مۇمكىندىك بەرۋ كەرەك، بۇل تاليبانعا يكەمدىلىك پەن ارەكەتىن باسقاشا جاساۋعا شىنايى ەرىك-جىگەردى كورسەتۋگە مۇمكىندىك بەرەدى، اسىرەسە ادام قۇقىقتارى، گەندەرلىك ساياسات جانە تەرروريزمگە قارسى تۇرۋ تۇرعىسىنان، – دەدى ليونس.

كەڭەس مۇشەلەرى قاراجاتتىڭ ماقساتسىز پايدالانىلماۋىن قامتاماسىز ەتۋ شارالارىن ويلاستىرۋعا بولاتىنىن ايتتى.